درخت آنے والی نسلوں کےلئے صحت مند ماحول کی ضمانت ہیں،پروفیسر فاروق افضل

بدھ 6 اگست 2025 17:59

لاہور (اُردو پوائنٹ اخبارتازہ ترین - اے پی پی۔ 06 اگست2025ء) پوسٹ گریجویٹ میڈیکل انسٹی ٹیوٹ امیر الدین میڈیکل کالج لاہور میں’’گرین پاکستان‘‘ مہم کے تحت شجرکاری مہم کا آغاز ہو گیا۔ مہم کا آغاز پرنسپل پروفیسر ڈاکٹر فاروق افضل نے پودا لگا کر کیا۔اس موقع پر ڈین انسٹی ٹیوٹ آف پبلک ہیلتھ پروفیسر سائرہ افضل،ایڈیشنل ڈین پی جی ایم آئی ڈاکٹر شائستہ مبین سمیت فیکلٹی ممبران نے کالج کے احاطے میں مختلف اقسام کے درخت اور پھول دار پودے لگائے۔

اس موقع پر پرنسپل نے درختوں کی اہمیت پر روشنی ڈالتے ہوئے کہا کہ شجرکاری ماحولیاتی تحفظ کے لئے ناگزیر ہے۔انہوں نے کہا کہ درخت نہ صرف ماحولیاتی آلودگی کے خاتمے میں مدد دیتے ہیں بلکہ ہماری آنے والی نسلوں کو ایک سرسبز،صحت مند اور خوشگوار ماحول فراہم کرتے ہیں۔

(جاری ہے)

انہوں نے کہا کہ شجرکاری ایک قومی فریضہ ہے جس میں ہر فرد کو اپنا کردار ادا کرنا چاہیئے۔

انہوں نے طلبہ کو تلقین کی کہ وہ نہ صرف خود درخت لگائیں بلکہ دوسروں کو بھی اس کار خیر میں شامل کریں تاکہ معاشرے میں شجرکاری کا شعور بیدار کیا جا سکے۔شرکا نے عہد کیا کہ وہ لگائے گئے پودوں کی دیکھ بھال کریں گے اور ماحول دوست طرز زندگی کو فروغ دینے کے لیے بھی کوشاں رہیں گے۔کالج انتظامیہ نے اس عزم کا اعادہ کیا کہ ادارے میں ماحولیاتی بہتری کے لئے مستقبل میں بھی ایسی مثبت سرگرمیوں کا تسلسل برقرار رکھا جائے گا۔

ڈین آئی پی ایچ پروفیسر سائرہ افضل نے کہا کہ شجرکاری مہم کا مقصد نہ صرف ماحولیاتی آلودگی پر قابو پانا ہے بلکہ عوامی صحت کے لئے ساز گار ماحول فراہم کرنا بھی ہے۔شجر کاری سے جہاں آکسیجن کی مقدار میں اضافہ ہو گا،وہیں سانس کی بیماریوں اور درجہ حرارت میں کمی کے علاوہ ذہنی دبائو جیسے مسائل کے خاتمے میں بھی مدد ملے گی۔ ایڈیشنل ڈین ڈاکٹر شائستہ مبین نے کہا کہ طبی ادارے کا فرض صرف علاج تک محدود نہیں۔صاف اور سر سبز ماحول صحت مند زندگی کی امانت ہے۔انہوں نے مزید کہا کہ اس اقدم سے نہ صرف ماحولیاتی بہتری آئے گی بلکہ حکومت پنجاب کے ’’کلین اینڈ گرین ‘‘پروگرام کو بھی تقویت ملے گی۔