بین الاقوامی برادری دو ریاستی حل کو سپورٹ کرے، سعودی کابینہ

اقوام متحدہ کے تمام رکن ممالک عالمی کانفرنس کے مشترکہ اعلامیے کو سپورٹ کریں،اجلاس

بدھ 6 اگست 2025 18:11

ریاض (اُردو پوائنٹ اخبارتازہ ترین - این این آئی۔ 06 اگست2025ء)سعود ی کابینہ نے بین الاقوامی برادری سے اسرائیل فلسطین تنازع کے دو ریاستی حل کی سپورٹ کے مطالبے کا اعادہ کیا ہے۔عرب ٹی وی کے مطابق کابینہ کا اجلاس نیوم میں ولی عہد و وزیراعظم شہزادہ محمد بن سلمان کی زیر صدارت ہوا۔اجلاس نے مسئلہ فلسطین کے پرامن حل اور دو ریاستی حل کے نفاذ سے متعلق اعلی سطح کی بین الاقوامی کانفرنس کے مثبت نتائج کا جائزہ لیا اور اسے سراہا جس کی میزبانی سعودی عرب اور فرانس نے مشترکہ طور پر کی۔

کابینہ نے متعدد ملکوں کی جانب سے فلسطینی ریاست کو تسلیم کرنے کے ارادے سے متعلق اعلانات کا خیرمقدم کیا۔فرانس، برطانیہ، کینیڈا، پرتگال، مالٹا اور دیگر ملکوں نے کہا ہے کہ وہ ستمبر میں اقوام متحدہ میں فلسطینی ریاست کو تسلیم کرسکتے ہیں۔

(جاری ہے)

اجلاس نے اقوام متحدہ کے تمام رکن ملکوں پر پھر زور دیا کہ وہ بین الاقوامی کانفرنس کے مشترکہ اعلامیے کی سپورٹ کریں جو دو ریاستی حل کے نفاذ کے لیے ایک جامع فریم ورک ہے، جس سے بین الاقوامی امن و سلامتی کے حصول، خطے اور اس کیعوام کے مستقبل کی تعمیر میں مدد ملے گی۔

بین الاقوامی کانفرنس کے اعلامیے میں فلسطینی ریاست کی سپورٹ،علاقائی اور بین الاقوامی تعاون کو مضبوط اور بین الاقوامی قانون کے احترام کو یقینی بنانے کی اہمیت پر زور دیا گیا۔