لاہور، یونان کشتی حادثہ 2023 میں ملوث ملزم سمیت 5 انسانی سمگلرز گرفتار

بدھ 6 اگست 2025 19:59

لاہور (اُردو پوائنٹ اخبارتازہ ترین - اے پی پی۔ 06 اگست2025ء) ایف آئی اے لاہور نے یونان کشتی حادثہ 2023 میں ملوث بدنام زمانہ ملزم سمیت5 انسانی سمگلرز گرفتار کر لیا۔ترجمان کے مطابق گرفتار ملزمان کی شناخت سبطین عباس، بلال احمد، وسیم اعظم، محمد ریاض اور محمد عامر فاروق کے نام سے ہوئی ہے۔ ملزمان کو چھاپہ مار کاروائیوں میں لاہور اور شیخوپورہ کے مختلف علاقوں سے گرفتار کیا گیا ۔

گرفتار ملزم سبطین عباس نے شہری کو اٹلی ورک ویزا پر بھجوانے کا جھانسہ دے کر 17 لاکھ روپے ہتھیائے۔ملزم نے شہری کو غیر قانونی طریقے سے بذریعہ کشتی لیبیا سے اٹلی بھجوانے کی کوشش کی ۔یونان کی سمندری حدود میں کشتی حادثے کا شکار ہو گئی تھی ۔ کشتی حادثہ میں معصوم شہری لاپتہ ہوگیا تھا۔ گرفتار ملزم بلال احمد نے شہری سے قطر ورک ویزا پر بھجوانے کے نام پر 6 لاکھ30 ہزار روپے بٹورے۔

(جاری ہے)

ملزم شہری کو بیرون ملک بھجوانے میں ناکام رہا۔ملزم بھاری رقوم وصول کر کے روپوش ہو گیا تھا۔ملزم کے قبضہ سے 13 پاکستانی پاسپورٹ بھی برامد ہوئے۔جبکہ ملزمان وسیم اعظم ،محمد ریاض اور محمد عامر فاروق گلف میڈیکل کنسلٹنٹ کی آڑ میں انسانی سمگلنگ میں ملوث پائے گئے۔ملزمان کے قبضے سے 11 پاکستانی پاسپورٹ،6 موبائل فون اور دیگر دستاویزی شواہد بشمول اصلی میڈیکل رپورٹس بھی برآمد۔گرفتار ملزمان سادہ لوح شہریوں سے فراڈ کرنے میں ملوث پائے گئے ۔ملزمان کو گرفتار کر کے تفتیش کا آغاز کر دیا گیا ہے۔