سعودی عرب، موبائل ڈیٹا استعمال کیے بغیر نسک ایپ کے تمام فیچرز تک مکمل رسائی ممکن بنا دی گئی

جمعرات 7 اگست 2025 10:40

ریاض (اُردو پوائنٹ اخبارتازہ ترین - اے پی پی۔ 07 اگست2025ء) سعودی وزارت حج وعمرہ نے موبائل ڈیٹا استعمال کیے بغیر ’’نسک ایپ ‘‘کے تمام فیچرز تک مکمل رسائی ممکن بنا دی ۔ اردو نیوز کے مطابق وزارت کے ترجمان نے کہا ہے کہ سعودی ٹیلی کام آپریٹرز ایس ٹی سی، زین اور موبایلی کے تعاون سے اس سروس کا مقصد عازمین کے سفر کو آسان بنانا اور حج وعمرہ خدمات کے ڈیجیٹل تجربے کو بڑھانا ہے۔

انہوں نے کہا کہ مملکت میں سم کارڈ استعمال کرنے والے شہری، رہائشی اور زائرین کسی ایکٹیو ڈیٹا پلان یا انٹرنیٹ کنکشن کے بغیر نسک ایپ کی تمام خدمات سے فائدہ اٹھا سکیں گے۔ اس میں پرمٹ کا اجرا، ریزرویشن اور ایپ کے ذریعے دیگر ڈیجیٹل سروسز تک رسائی شامل ہے۔ اب زائرین موبائل ڈیٹا استعمال کئے بغیر روضہ شریفہ مدینہ منورہ کے لئے پرمٹ، حرمین ہائی سپیڈ ٹرین کے ٹکٹ کی بکنگ، نسک میپ کے ساتھ نیویگیٹ، نسک اے آئی اسسٹنٹ کا استعمال، انکوائری یا رپورٹس جمع کرانا شامل ہیں۔

(جاری ہے)

نسک کے سی ای او انجییئر احمد المیمان نے کہا کہ یہ تعاون عازمین اور زائرین کے لئے ڈیجیٹل تجربے کو بڑھانے کے لئے ایک اہم قدم ہے جو انہیں حج، عمرے یا روضہ شریفہ کے لئے ان کےدورے میں سہولت فراہم کرتا ہے۔ انہوں نے کہا کہ یہ اقدام کراوڈ مینجمنٹ کو بھی بہتر بناتا ہے، ضروری معلومات تک فوری رسائی ممکن ہوتی ہے، گمشدہ زائرین کی تعداد میں کمی کے ساتھ پرمٹ ویری فیکیشن پراسس کے عمل کو تیز کرتا ہے۔

دنیا کے 100 سے زیادہ ممالک میں نسک ایپ استعمال کی جاسکتی ہے اور 10 زبانوں میں سروسز سے استفادہ کیا جاسکتا ہے۔ ایپ میں نئی خدمات کا اضافہ کیا گیا ہے ان میں نسک تسبیح، حصن المسلم ، دعائیں اور اذکار، حرمین سے تلاوت، آگاہی کارڈز، مثالی تاریخی مقامات کی معلومات اور مختلف اہم مقامات کے نقشوں کے علاوہ پروموشنز اور پروگرامز بارے معلومات شامل ہیں۔ واضح رہے کہ نسک ایپ کو 25 سرکاری اداروں سے لنک کیا گیا ہے جبکہ جدید ترین ڈیجیٹل سسٹم کے ذریعے ایپ کو آپریٹ کیا جاتا ہے۔