صرف 1 دن میں غیر ملکی سرمایہ کاروں نے بھارت سے 50 ارب ڈالرز نکال لیے

امریکی صدر کے 50 فیصد ٹیرف کے فیصلے کے بعد بھارتی اسٹاک مارکیٹ میں بھونچال، بھارتی مارکیٹ بدترین مندی کا شکار ہو گئی

محمد علی جمعہ 8 اگست 2025 19:55

ممبئی (اُردو پوائنٹ اخبارتازہ ترین۔ 08 اگست2025ء) صرف 1 دن میں غیر ملکی سرمایہ کاروں نے بھارت سے 50 ارب ڈالرز نکال لیے، امریکی صدر کے 50 فیصد ٹیرف کے فیصلے کے بعد بھارتی اسٹاک مارکیٹ میں بھونچال، بھارتی مارکیٹ بدترین مندی کا شکار ہو گئی۔ تفصیلات کے مطابق امریکی صدر ڈونلڈ ٹرمپ کی جانب سے بھارتی مصنوعات پر 50 فیصد ٹیرف عائد کرنے کے اعلان نے بھارتی اسٹاک مارکیٹ کو بری طرح ہلا کر رکھ دیا۔

بھارتی اسٹاک مارکیٹ جمعرات کے روز بدترین مندی کی زد میں رہی۔ غیر ملکی میڈیا رپورٹس کے مطابق امریکی ٹیرف کے اعلان کے بعد پیدا ہونے والی صورتحال کے باعث صرف جمعرات کے روز غیر ملکی سرمایہ کاروں نے بھارتی مارکیٹ سے تقریباً 50 ارب ڈالر نکال لیے۔ دوسری جانب امریکی صدر ڈونلڈ ٹرمپ نے ٹیرف کے تنازعے کے حل تک بھارت کے ساتھ تجارتی مذاکرات کو خارج از امکان قراردیا۔

(جاری ہے)

کشمیر میڈیا سروس کے مطابق وائٹ ہائوس میں ایک پریس کانفرنس کے دوران صحافیوں نے صدر ڈونلڈ ٹرمپ سے سوال کیاکہ کیا بھارت پر 50فیصد ٹیرف عائد کرنے کے اعلان کے بعدوہ بھارت کے تجارتی مذاکرات کے آگے بڑھانے کی توقع رکھتے ہیں ۔جس کا جواب امریکی صدرنے نفی میں دیا۔ انہوں نے کہاکہ موجودہ حالات میں بھارت کے ساتھ تجارتی مذاکرات نہیں ہوں گے۔انہوں نے کہاکہ جب تک ہم اسے حل نہیں کرتے، بھارت اور امریکہ کے درمیان تجارتی مذاکرات آگے نہیں بڑھیں گے۔

واضح رہے کہ وائٹ ہائوس نے بدھ کے روز ایک ایگزیکٹو آرڈر کے ذریعے روس سے تیل درآمد کرنے پر بھارتی مصنوعات پر مزید 25فیصد ٹیرف عائد کیا تھاجس کے بعد بھارت پر عائد کیاگیا مجموعی امریکی ٹیرف 50فیصد ہو گیاہے ۔ امریکی حکام کے مطابق، ابتدائی25فیصد ٹیرف 7 اگست سے نافذ العمل ہوگیاہے جبکہ اضافی 25فیصد ٹیرف تین ہفتوں بعد نافذ العمل ہو گا ۔