جنوبی وزیرستان کے لوئر وانا بازار میں بم دھماکہ، 2 افراد جاں بحق 14 زخمی

شکئی سٹینڈ کے قریب پولیس وین کے پاس زور دار دھماکہ ہوا جہاں ریمورٹ کنٹرول بم کے ذریعے حملہ کیا گیا

ساجد علی جمعرات 7 اگست 2025 12:01

جنوبی وزیرستان کے لوئر وانا بازار میں بم دھماکہ، 2 افراد جاں بحق 14 زخمی

وانا ( اُردو پوائنٹ اخبارتازہ ترین۔ 07 اگست 2025ء ) صوبہ خیبرپختونخواہ کے علاقہ جنوبی وزیرستان کے لوئر وانا بازار میں ٹیکسی سٹینڈ کے قریب بم دھماکے میں 2 افراد جاں بحق اور 14 افراد زخمی ہوگئے۔ پولیس حکام کے مطابق وانا بازار میں شکئی سٹینڈ کے قریب پولیس وین کے پاس زور دار دھماکہ ہوا جہاں ریمورٹ کنٹرول بم کے ذریعے دھماکہ کیا گیا، اس واقعے میں دو پولیس اہلکار زخمی ہوئے جب کہ متعدد عام شہریوں کے زخمی ہونے کی بھی اطلاعات موصول ہوئی ہیں، زخمیوں کو فوری طور پر وانا ہیڈکوارٹر ہسپتال منتقل کردیا گیا جہاں انہیں طبی امداد فراہم کی جا رہی ہے، ڈسٹرکٹ پولیس آفیسر طاہر شاہ نے بتایا کہ دھماکے اور فائرنگ کے بعد علاقے میں سکیورٹی اہلکاروں کی بھاری نفری تعینات کر دی گئی اور واقعے کے شواہد اکٹھے کیے جا رہے ہیں۔

(جاری ہے)

چند روز قبل خیبرپختونخواہ کے ضلع لکی مروت کے تھانہ صدر کی حدود میں بھی ایک افسوس ناک واقعہ پیش آیا تھا جہاں ایک مارٹر گولا پھٹنے سے 5 بچے جاں بحق اور ایک خاتون اور 11 بچوں سمیت 12 افراد شدید زخمی ہوئے، پولیس کا کہنا تھا کہ بچوں کو ایک کھلے میدان میں کھیلتے ہوئے وہاں سے مارٹر گولا ملا جسے وہ کوئی کھیلنے کی چیز سمجھ کر اٹھا کر گھر لے گئے لیکن گھر پہنچنے کے بعد گولہ اچانک پھٹ گیا جس کے نتیجے میں خوفناک دھماکہ ہوا اور اس کے باعث یہ حادثہ پیش آیا۔

ترجمان ریسکیو نے بتایا کہ دھماکے کی اطلاع ملتے ہی ریسکیو ایمبولینسز جائے وقوعہ پر پہنچ گئیں جنہوں نے زخمیوں اور جاں بحق ہونے والے بچوں کو فوری طور پر قریبی ہسپتال منتقل کیا، ہسپتال ذرائع نے تصدیق کی کہ 12 زخمیوں میں زیادہ تر بچے ہیں جن میں کچھ کی حالت تشویشناک ہے، پولیس نے واقعے کی تحقیقات شروع کر دی ہیں اور بم ڈسپوزل سکواڈ کی جانب سے علاقے میں مزید مارٹر شیلز کی موجودگی کا جائزہ لیا گیا۔