پنجاب یونیورسٹی شعبہ سوشل ورک کے زیر اہتمام ڈیجیٹل تبدیلی پر سیمینار کا انعقاد

جمعرات 7 اگست 2025 22:05

لاہور (اُردو پوائنٹ اخبارتازہ ترین - این این آئی۔ 07 اگست2025ء)پاکستان کی79ویں یوم آزادی کی تقریبات کے سلسلے میںپنجاب یونیورسٹی شعبہ سوشل ورک کے زیراہتمام سنٹر آف انفارمیشن ٹیکنالوجی کے تعاون سے ’’ڈیجیٹل تبدیلی: 2047ء تک کا روڈ میپ‘‘کے موضوع پر سیمینار کا انعقاد کیاگیا۔اس موقع پر چیئرپرسن شعبہ سوشل ورک پروفیسر ڈاکٹر عظمیٰ عاشق، ڈائریکٹرسنٹر آف انفارمیشن ٹیکنالوجی سر سید عمار جعفری، ماہرین بشمول نبیلہ انتصار، عنبرین سپرا، ساحر ملک، ارم شاہین ملک، فیکلٹی ممبران ودیگرنے شرکت کی۔

اپنے خطاب میں ڈاکٹر عظمیٰ عاشق نے کہا کہ یہ تقریب پاکستان کے 79ویں یوم آزادی کے سلسلے کی کڑی ہے جس میں ملک کے ڈیجیٹل اور جامع مستقبل کے لیے پختہ عزم کا اظہار کیا گیا۔

(جاری ہے)

انہوں نے کہا کہ سیمینارشعبہ کے غیر متزلزل مشن کی عکاسی کرتا ہے،کمیونٹیز کو بااختیار بنانا، سماجی انصاف کو فروغ دینا اور اس بات کو یقینی بنانا کہ ڈیجیٹل دور میں کوئی بھی پیچھے نہ رہے۔

انہوں نے کہاکہ یہ ظاہر کرتا ہے کہ کہ سوشل ورک کی تعلیم کس طرح ابھرتی ہوئی ٹیکنالوجیز، ڈیجیٹل خواندگی اور پالیسی جدت طرازی کے ذریعے عصری عالمی چیلنجوں سے ہم آہنگ ہو رہی ہے۔ڈائریکٹر سی آئی ٹی سر سید عمار جعفری نے 2047 تک ڈیجیٹل طور پر بااختیار، جامع پاکستان کے لیے ایک متاثر کن روڈ میپ پیش کیا۔ انہوں نے کہا کہ سیمینار نے ڈیجیٹل جدت، جامع ترقی اور پائیدار پیش رفت کے ساتھ سماجی کام کی اقدار کو تلاش کرنے کے لیے ایک پلیٹ فارم کے طور پر کام کیاہے ۔

ماہرین نے ڈیجیٹل تعلیم اور مہارت کی ترقی، مصنوعی ذہانت سے چلنے والی پالیسی سازی اور اکیڈیمیا میں تحقیق، سماجی تحفظ کے دائرے میں سائبر سیکیورٹی، ابھرتی ہوئی ٹیک اسپیسز میں خواتین اور نوجوانوں کی شمولیت، ایس ڈی جی فریم ورک کے ساتھ تعلیمی اصلاحات کو ہم آہنگ کرنے پر روشنی ڈالی۔