لاہور چیمبر اور منڈی بہاؤالدین چیمبر کاروباری برادری و معاشی بہتری کے لیے مل کر کام کریں گے‘شاہد نذیر چودھری

جمعرات 7 اگست 2025 23:01

لاہور (اُردو پوائنٹ اخبارتازہ ترین - این این آئی۔ 07 اگست2025ء) لاہور چیمبر آف کامرس اینڈ انڈسٹری اور منڈی بہاؤالدین چیمبر آف کامرس اینڈ انڈسٹری نے کاروباری برادری کے مسائل کے حل، صنعت و تجارت کے فروغ اور پالیسی سازی میں مشترکہ کاوشوں کے لیے قریبی روابط اور تعاون کو فروغ دینے پر اتفاق کیا ہے۔ یہ فیصلہ لاہور چیمبر کے نائب صدر شاہد نذیر چوہدری اور منڈی بہاؤالدین چیمبر کے سینئر نائب صدر (ر) کیپٹن تیمور احمد کے درمیان ہونے والی ملاقات میں کیا گیا جس میں لاہور چیمبر کے سابق سینئر نائب صدر علی حسام اصغر بھی موجود تھے۔

ملاقات میں دونوں چیمبرز کے عہدیداران نے اس بات پر زور دیا کہ پاکستان کو درپیش موجودہ معاشی چیلنجز کا حل باہمی مشاورت، پالیسی اصلاحات اور کاروباری برادری کے فعال کردار سے ہی ممکن ہے۔

(جاری ہے)

لاہور چیمبر کے نائب صدر شاہد نذیر چوہدری نے اس موقع پر کہا کہ لاہور چیمبر ہمیشہ سے چھوٹے شہروں اور زونل چیمبرز کے ساتھ تعاون پر یقین رکھتا ہے اور منڈی بہاؤالدین چیمبر کے ساتھ اشتراک کو مزید فروغ دیا جائے گا۔

اٴْنہوں نے کہا کہ دونوں ادارے تجربات کے تبادلے، تجارتی وفود کے تبادلے، مشترکہ سیمینارز، ورکشاپس اور پالیسی تجاویز پر مل کر کام کریں گے۔منڈی بہاؤالدین چیمبر کے سینئر نائب صدر (ر) کیپٹن تیمور احمد نے کہا کہ لاہور چیمبر کی ملکی معیشت میں خدمات قابل تحسین ہیں اور چھوٹے شہروں کے چیمبرز کے ساتھ اٴْن کا تعاون خوش آئند ہے۔ انہوں نے کہا کہ لاہور چیمبر کے ساتھ روابط سے منڈی بہاؤالدین کی کاروباری برادری کو بھرپور فائدہ ہوگا اور مشترکہ اقدامات سے خطے میں تجارتی سرگرمیوں کو نئی جہت ملے گی۔

سابق سینئر نائب صدر علی حسام اصغر نے کہا کہ تمام چیمبرز کو آپس میں مضبوط روابط قائم کر کے پالیسی ساز اداروں پر مؤثر آواز بلند کرنی چاہیے تاکہ معیشت کے حقیقی مسائل کو اجاگر کیا جا سکے۔شرکائے ملاقات نے اس بات پر بھی اتفاق کیا کہ وفاقی اور صوبائی سطح پر کاروباری برادری کو درپیش چیلنجز کے حل کے لیے ایک مربوط اور منظم لائحہ عمل اختیار کیا جائے گا اور دونوں چیمبرز ایک دوسرے کے پلیٹ فارم کو بروئے کار لا کر ملکی معیشت کی بہتری میں اپنا بھرپور کردار ادا کریں گے۔