بحریہ ٹائون کی 6کمرشل جائیدادوں میں سے ایک نیلام، 2کی مشروط بولی موصول

جمعرات 7 اگست 2025 21:05

راولپنڈی (اُردو پوائنٹ اخبارتازہ ترین - این این آئی۔ 07 اگست2025ء) نیب راولپنڈی عدالت سے منظور شدہ پلی بارگین کی غیر ادا رقوم کی وصولی کی کوششوں کے سلسلے میں ملک ریاض اور بحریہ ٹائون سے منسلک 6کمرشل جائیدادوں کی نیلامی کی۔نیب کی جانب سے جاری بیان کے مطابق روبیش مارکی کوکامیابی کے ساتھ 500 ملین روپے میں نیلام کیا گیا، اب پیمنٹ اور ٹرانسفر کا عمل جاری ہے۔

(جاری ہے)

اس کے علاوہ کارپوریٹ آفس ون کیلئے ریزرو قیمت یا اس سے زیادہ کی مشروط پیشکش کی گئی، اس سلسلے میں نیب مجاز اتھارٹی سے حتمی منظوری زیر التوا ہے۔جاری بیان کے مطابق کارپوریٹ آفسIIکیلئے بھی ریزرو پرائس یا اس سے زیادہ کی مشروط پیشکش کی گئی اور نیب کی مجاز اتھارٹی سے اس کی بھی حتمی منظوری زیر التوا ہے۔ نیب راولپنڈی نے کہا کہ کوالیفائنگ بِڈز نہ ہونے کی وجہ سے 3جائیدادیں فروخت نہیں ہوئیں ،اس سلسلے میں جلد ہی دوبارہ نیلامی کا اعلان کیا جائے گا۔نیب نے کہا ہے کہ نیب عوامی رقوم کی شفاف برآمدگی اور احتساب کے قوانین پر سختی سے عمل درآمد کیلئے پرعزم ہے۔