پشاور، جشن آزادی تقریبات، نمائشی کرکٹ میچ میں ڈائریکٹوریٹ جنرل سپورٹس نے ایس ڈبلیو اے کو شکست دیدی

جمعہ 8 اگست 2025 20:50

پشاور (اُردو پوائنٹ اخبارتازہ ترین - اے پی پی۔ 08 اگست2025ء) ڈائریکٹوریٹ جنرل آف سپورٹس خیبرپختونخوا، ریجنل سپورٹس آفس پشاور اور ضلعی انتظامیہ کے زیراہتمام جشن آزادی کی تقریبات کے سلسلے میں قیوم سپورٹس کمپلیکس پشاور میں منعقدہ نمائشی کرکٹ میچ میں ڈائریکٹریٹ جنرل آف سپورٹس خیبرپختونخوا نے سپورٹس رائٹرز ایسوسی ایشن خیبرپختونخوا کی ٹیم کو چالیس رنز سے شکست دے کر ٹرافی اپنے نام کرلی۔

ایڈمنسٹریٹر پشاور سپورٹس کمپلیکس یوسف آفریدی کو بہترین پرفارمنس پر مین آف دی میچ قرار دیا گیا جبکہ صوبائی وزیر کھیل وامور نوجوانان سید فخر جہان نے فاتح کھلاڑیوں میں انعامات تقسیم کئے۔ ان کے ہمراہ ڈی جی سپورٹس تاشفین حیدر، ریجنل سپورٹس آفیسر کاشف فرحان، ا ے ڈی اکاؤنٹس شاہ فیصل، خیبر یونین جرنلسٹس کے جنرل سیکرٹری ارشاد علی، سپورٹس رائٹرز کے صدر عاصم شیراز سمیت دیگراہم شخصیات موجود تھی۔

(جاری ہے)

صوبائی حکومت کے احکامات کی روشنی میں جشن آزادی کی تقریبات کے سلسلے میں نمائشی کرکٹ میچ میں محکمہ کھیل کی ٹیم جس کی قیادت صوبائی وزیر کھیل و امور نوجوانان سید فخر جہان کر رہے تھے نے ٹاس جیت کر پہلے بیٹنگ کرتے ہوئے مقررہ دس اوورز میں 120 رنز بنائے جس میں یوسف آفریدی 55، وزیر کھیل سید فخر جہان 25 اور ڈی جی سپورٹس تاشفین حیدر 18 رنز کے ساتھ نمایاں سکورر رہے۔

ایس ڈبلیو اے کی جانب سے شاہد آفریدی، ارشاد علی، شہزادہ فہد اور بلال آفریدی نے ایک ایک کھلاڑی کو آؤٹ کیا۔ جواب میں سپورٹس رائٹرز کی ٹیم مطلوبہ ہدف کے تعاقب میں 80 رنز بناسکی۔ ارشاد علی 22، بلال آفریدی 19 اور وقار احمد 14 رنز کے ساتھ نمایاں سکور رہے۔ اس طرح ڈائریکٹر جنرل سپورٹس کی ٹیم نے چالیس رنز سے کامیابی حاصل کرکے ٹرافی اپنے نام کرلی۔ آخر میں مہمان خصوصی صوبائی وزیر کھیل و امور نوجوانان سید فخر جہان نے فاتح کھلاڑیوں میں انعامات تقسیم کئے۔ یوم آزادی تقریبات کے سلسلے میں 14 اگست تک مختلف پروگرامز منعقد ہونگے۔