نان فائلرز کیلئے بینک سے رقوم نکلوانے پر عائد ٹیکس میں اضافے کا اطلاق کردیا گیا

جمعہ 8 اگست 2025 21:35

اسلام آباد (اُردو پوائنٹ اخبارتازہ ترین - این این آئی۔ 08 اگست2025ء)ایف بی آر نے رواں مالی سال 2025-26ء کے وفاقی بجٹ میں نان فائلرز کے لیے بینک سے رقوم نکلوانے پر عائد ٹیکس میں اضافے کا اطلاق کردیا ۔ایف بی آر کے مطابق ایکٹیو ٹیکس پیئرز لسٹ میں شامل نہ ہونے والے افراد پر بینک سے رقوم نکلوانے پر ٹیکس کٹوتی میں اضافہ کیا گیا ہے۔ایف بی آر کے مطابق یومیہ 50ہزار سے زائد رقم نکلوانے پر 0.8فیصد ٹیکس لاگو ہے جبکہ اس سے قبل یومیہ 50ہزار سے زائد رقم نکلوانے پر0.6فیصد ٹیکس عائد تھا۔

بیان کے مطابق ہر بینکنگ کمپنی نان فائلر سے ایڈوانس ایڈجسٹیبل ٹیکس منہا کرنے کی مجاز ہوگی، اسی طرح غیر منقولہ جائیداد کی خرید و فروخت یا منتقلی پر ایڈوانس ٹیکس کی شرح میں تبدیلی کردی گئی۔پراپرٹی کے خریدار کو ریلیف دینے کیلئے ودہولڈنگ ٹیکس میں 1.5فیصد کمی کردی گئی ہے، پراپرٹی کے فروخت کنندہ یا منتقل کرنے والے کیلئے ہر سلیب میں 1.5فیصد اضافہ کیا گیا ہے جس کا مقصد فروخت کنندہ کو جائیداد کی فروخت پر حاصل کیپٹل گین کی ایڈجسٹمنٹ ہے۔

(جاری ہے)

ایف بی آر کے مطابق اس مقصد کیلئے انکم ٹیکس کے سیکشن 236سی اور 236کے میں ردوبدل کیا گیا ہے۔ ایف بی آر کے مطابق 5کروڑ روپے مالیت تک کی پراپرٹی کی خریداری پر ٹیکس 1.5فیصد ہوگیا، اس سے قبل5کروڑ تک کی پراپرٹی کی خرید پر ٹیکس کی شرح 3فیصد تھی،اسی طرح 10 کروڑ تک کی پراپرٹی کی خریداری پر ٹیکس 3.5سے کم ہو کر2فیصد رہ گیا ہے اور کروڑ سے زائد مالیت کی پراپرٹی خریدنے پر 4کے بجائے 2.5فیصد ٹیکس دینا ہوگا۔