Live Updates

پی ڈی ایم اے پنجاب کا دریائے ستلج اور ملحقہ ندی نالوں میں سیلاب بارے الرٹ جاری

13 اگست سے ملک کے بالائی علاقوں میں مون سون کے نئے سپیل کا امکان ہے‘ ترجمان

جمعہ 8 اگست 2025 21:45

لاہور(اُردو پوائنٹ اخبارتازہ ترین - این این آئی۔ 08 اگست2025ء)پرونشل ڈیزاسٹر مینجمنٹ اتھارٹی نے دریائے ستلج اور ملحقہ ندی نالوں میں سیلاب بارے الرٹ جاری کردیا۔پی ڈی ایم اے ترجمان کے مطابق 13 اگست سے مون سون بارشوں کے باعث دریائے ستلج میں پانی کے اضافے کا خدشہ ہے، 13 اگست سے ملک کے بالائی علاقوں میں مون سون کے نئے سپیل کا امکان ہے، بالائی آبی ذخائر سے پانی کے اخراج کے باعث دریائے ستلج میں پانی کے بہا ئومیں اضافہ ہوسکتا ہے۔

دوسری جانب ڈی جی پی ڈی ایم اے عرفان علی کاٹھیا کا کہنا تھا کہ گنڈا سنگھ کے مقام پر پانی کی سطح میں اضافے کا خدشہ ہے، گزشتہ ہفتے کے دوران بھارتی ڈیمز میں پانی کی سطح میں غیر معمولی اضافہ ہوا ہے، دریائے ستلج پر قائم بھاکڑا ڈیم 61 فیصد تک بھر چکا ہے۔

(جاری ہے)

انہوں نے کہا کہ پونگ ڈیم میں پانی کا ذخیرہ 76 فیصد جبکہ تھین ڈیم میں 64 فیصد ہے، پی ڈی ایم اے پنجاب ارسا اور محکمہ آب پاشی 24 گھنٹے دریاں کی صورتحال کو مانیٹر کر رہے ہیں جب کہ صوبے بھر کے کمشنرز و ڈپٹی کمشنرز کو الرٹ جاری کردیا ہے۔

علاوہ ازیں ڈی جی پی ڈی ایم اے ریلیف کمشنر پنجاب نبیل جاوید نے بھی لوکل گورنمنٹ، محکمہ زراعت، محکمہ آب پاشی، محکمہ صحت، محکمہ جنگلات، لائیو سٹاک اور محکمہ ٹرانسپورٹ کو الرٹ رہنے کی ہدایات جاری کی ہیں۔