Live Updates

موسمیاتی تبدیلی تباہی میں بدل چکی، جدید ترین پیشگی وارننگ سسٹم پنجاب میں متعارف کرائیں گے

سیلاب سے بحالی کے بعد تجاوزات کے خاتمے کیلئے بھی مؤثر آپریشن ہوگا، حالیہ تجربات کی روشنی میں حکومت ایک جامع حکمت عملی تیار کرے گی تاکہ مستقبل میں نقصانات کو کم کیا جاسکے، سینئر وزیرمریم اورنگزیب

ثنااللہ ناگرہ ہفتہ 30 اگست 2025 19:14

موسمیاتی تبدیلی تباہی میں بدل چکی، جدید ترین پیشگی وارننگ سسٹم پنجاب ..

لاہور ( اردوپوائنٹ اخبار تازہ ترین۔ آئی پی اے ۔ 30 اگست 2025ء ) سینئر صوبائی وزیر مریم اورنگزیب نے کہا ہے کہ وزیراعلیٰ پنجاب مریم نواز شریف مشکل کی اس گھڑی میں عوام کے ساتھ ہیں۔ عوام کی خدمت اور مدد کے لیے تاریخ کا سب سے بڑا ریلیف آپریشن وزیراعلیٰ کی براہ راست نگرانی میں تیزی سے جاری ہے۔ انہوں نے کہا کہ وزیراعلیٰ مریم نواز کی ہدایت پر وزراء، ارکان اسمبلی، ضلعی انتظامیہ، ریسکیو 1122، پولیس، سول ڈیفنس اور تمام متعلقہ ادارے ایک مٹھی بن کر متاثرین کی مدد میں مصروف عمل ہیں۔

پنجاب کی تاریخ کے بدترین سیلاب میں عوام کی جانیں بچانے اور انہیں محفوظ مقامات پر منتقل کرنے کے لیے گرینڈ ریسکیو آپریشن پوری رفتار اور تمام دستیاب مشینری و وسائل کے ساتھ جاری ہے۔سینئر صوبائی وزیر نے کہا کہ وزیراعلیٰ مریم نواز شریف ریسکیو آپریشن کی خود نگرانی کر رہی ہیں اور امدادی سرگرمیوں کا مسلسل جائزہ لے رہی ہیں۔

(جاری ہے)

اب تک پنجاب میں سیلاب کے باعث جاں بحق افراد کی تعداد 30 ہو چکی ہے، جبکہ تین دریاؤں کے سیلابی پانی سے مجموعی طور پر 2 ہزار 38 موضع جات متاثر ہوئے ہیں۔

اعداد و شمار کے مطابق دریائے چناب سے 1 ہزار 169، دریائے راوی سے 462 اور دریائے ستلج سے 391 موضع جات متاثر ہوئے ہیں۔ سیلاب سے مجموعی طور پر 15 لاکھ 16 ہزار 603 افراد متاثر ہوئے جن میں سے 4 لاکھ 81 ہزار سے زائد افراد کو محفوظ مقامات پر منتقل کر دیا گیا ہے۔ سینئر صوبائی وزیر نے مزید بتایا کہ 511 ریلیف اور 351 میڈیکل کیمپس چوبیس گھنٹے متاثرین کی مدد اور دیکھ بھال کر رہے ہیں۔

6 ہزار 373 متاثرین ریلیف کیمپس میں مقیم ہیں، جبکہ 4 لاکھ 5 ہزار سے زائد مویشیوں کو بھی محفوظ مقامات پر منتقل کیا جا چکا ہے۔ مویشیوں کے علاج کے لیے 321 ویٹرنری کیمپس قائم کیے گئے ہیں۔انہوں نے کہا کہ ریسکیو مشنز کے لیے کشتیوں کی تعداد بڑھا کر 808 کر دی گئی ہے اور صرف 36 گھنٹوں میں 68 ہزار 477 افراد کو ریسکیو کیا گیا۔ وزیراعلیٰ مریم نواز شریف کے پیشگی حفاظتی انتظامات اور تجاوزات کے خلاف آپریشن کے باعث اتنے بڑے سیلاب میں بڑے جانی نقصان سے پنجاب بچ گیا، جس پر ہم اللہ تعالیٰ کے شکر گزار ہیں۔

سینئر صوبائی وزیر نے کہا کہ موسمیاتی تبدیلی اب تباہی میں بدل چکی ہے، اسی لیے جدید ترین پیشگی وارننگ سسٹم پنجاب میں متعارف کرایا جائے گا۔ سیلاب سے بحالی کے بعد تجاوزات کے خاتمے کے لیے بھی مؤثر آپریشن ہوگا۔ حالیہ تجربات کی روشنی میں حکومت ایک جامع حکمت عملی تیار کرے گی تاکہ مستقبل میں نقصانات کو کم کیا جا سکے۔ انہوں نے مزید کہا کہ ریسکیو اور ریلیف میں دن رات خدمات انجام دینے والے ہمارے ہیروز ہیں، جبکہ متاثرین کی بحالی اور نقصانات کا ازالہ حکومت کی اولین ترجیح ہے۔