شمالی اور جنوبی وزیرستان میں کرفیو نافذ

اس دوران عوام سڑکوں سے دور رہیں،ڈپٹی کمشنر شمالی وزیرستان کا نوٹیفکیشن جاری

جمعہ 8 اگست 2025 22:45

شمالی وزیرستان(اُردو پوائنٹ اخبارتازہ ترین - این این آئی۔ 08 اگست2025ء)خیبرپختونخوا کے ضلع شمالی وزیرستان میں (آج)ہفتہ کی صبح 5بجے سے سوموار 10اگست کی شام 7بجے اور جنوبی وزیرستان کی تحصیل برمل میں (آج)9اگست کو کرفیو نافذ کر دیا گیا اور ڈپٹی کمشنر نے نوٹیفیکیشن بھی جاری کر دیا۔شمالی وزیرستان کے ضلع بھر میں کرفیو کے نفاذ سے متعلق جاری نوٹیفکیشن میں کہا گیا ہے کہ کرفیو کے دوران عوام سڑکوں سے دور رہیں۔

کرفیو کے حوالے سے کہا گیا کہ اس دوران سیکیورٹی فورسز کی نقل و حمل رہے گی اور کرفیو کا مقصد فورسز کی نقل و حمل کے دوران شرپسندوں کی کسی بھی کارروائی میں شہریوں کی جانوں اور سیکورٹی فورسز کو محفوظ بنانا ہے۔بتایا گیا کہ اس دوران صرف ناگزیر صورت میں متعلقہ ضلعی یا سیکیورٹی فورسز حکام کی اجازت سے اصل شناختی دستاویزات پیش کرنے پر نقل و حرکت کی اجازت دی جائے گی۔

(جاری ہے)

دوسری جانب ڈپٹی کمشنر کی سفارش پر (آج)ہفتہ کو صبح 6بجے سے شام 7بجے تک ضلع جنوبی وزیرستان لوئر کی تحصیل برمل میں کرفیو نافذ رہے گا۔نوٹیفکیشن میں بتایا گیاکہ کرفیو کے دوران ہر قسم کی نقل و حرکت پر مکمل پابندی ہوگی اور مذکورہ حدود میں تمام بازاراورمارکیٹس بند رہیں گے۔شہریوں سے کہا گیا کہ خمرنگ-رغزئی -شولام تا وانا-وانا-تیارزہ گیٹ-کرب کوٹ-تنائی - عزیز آباد چوک تا درگئی پل کے راستوں پر داخلہ سختی سے منع ہے۔

انتظامیہ کی جانب سے اہم ہدایت جاری کی گئی کہ صرف ایمرجنسی کی صورت میں پولیس یا سیکیورٹی فورسز کی اجازت کے ساتھ، شناختی کارڈ اور کاغذات جمع کروا کر سفر جاری رکھا جا سکتا ہے۔اسی طرح سیکیورٹی فورسز کی گاڑی دیکھ کر گاڑی کو 100 میٹر فاصلے پر سڑک سے نیچے اتار لیا جائے۔