Live Updates

ڈپٹی کمشنر کی مثبت حکمت عملی سے دالوں ااور دیگر اشیا ضروریہ کی قیمتوں میں 60نمایاں کمی

ہفتہ 9 اگست 2025 21:10

لاہور (اُردو پوائنٹ اخبارتازہ ترین - اے پی پی۔ 09 اگست2025ء) ڈپٹی کمشنر لاہور سید موسیٰ رضا کی زیرقیادت ضلعی انتظامیہ نے اپنی موثر حکمت عملی کے ذریعے شہریوں کو ریلیف فراہم کرنے میں قابل ذکر کامیابی حاصل کی ہے۔ انتظامیہ کی جانب سے جاری کردہ نئے نوٹیفکیشن کے تحت متعدد اشیائے ضروریہ کی قیمتوں میں نمایاں کمی کی گئی ہے جس سے لاہور کے لاکھوں شہریوں کو فوری ریلیف حاصل ہوا ہے۔

طلب و رسد میں توازن برقرار رکھنے کی موثر پالیسی کے نتیجے میں دال مونگ کی قیمت میں 60روپے فی کلو کی سب سے بڑی کمی کرتے ہوئے اسے 325روپے فی کلو مقرر کیا گیا ہے۔ اسی طرح دال ماش دھلی ہوئی 40روپے سستی ہو کر 410روپے فی کلو، بیسن 30روپے کمی سے 270روپے فی کلو، دال چنا اسپیشل 20 روپے کم ہو کر 275روپے فی کلو اور کالا چنا موٹا 20روپے کمی کے ساتھ 260روپے فی کلو کر دیا گیا ہے۔

(جاری ہے)

سفید چنا بھی 15روپے سستا ہو کر 295روپے فی کلو مقرر کیا گیا ہے۔ ڈپٹی کمشنر سید موسی رضا نے واضح کیا کہ شہریوں کو ریلیف کی فراہمی انتظامیہ کی اولین ترجیح ہے۔ انہوں نے تمام دکانداروں کو ہدایت جاری کرتے ہوئے کہا کہ نئی قیمتوں کی فہرست نمایاں جگہ پر لازمی آویزاں کی جائے اور مقرر کردہ قیمتوں پر عملدرآمد ہر صورت یقینی بنایا جائے گا۔ ڈی سی نے زور دیتے ہوئے کہا کہ شہریوں کے حقوق کا تحفظ ضلعی انتظامیہ کی بنیادی ذمہ داری ہے اور اس سلسلے میں کوئی کمی برداشت نہیں کی جائے گی۔

دال مسور، دودھ، مٹن، بیف اور روٹی کی قیمتیں مستحکم رکھی گئی ہیں تاہم چاول کی قیمت میں معمولی اضافہ کیا گیا ہے۔ ضلعی انتظامیہ کی اس بروقت کارروائی سے نہ صرف مہنگائی کے خلاف جنگ میں ایک اہم پیش قدمی ہوئی ہے بلکہ عوام کو یقین دلایا گیا ہے کہ حکومتی مشینری ان کی بہبود کے لیے ہر وقت فعال ہے۔