علامہ اقبال اوپن یونیورسٹی میں بورڈ آف ایڈوانسڈ سٹڈیز اینڈ ریسرچ کا 74 واں اجلاس اختتام پذیرہو گیا

منگل 12 اگست 2025 17:04

اسلام آباد (اُردو پوائنٹ اخبارتازہ ترین - اے پی پی۔ 12 اگست2025ء) علامہ اقبال اوپن یونیورسٹی میں بورڈ آف ایڈوانسڈ سٹڈیز اینڈ ریسرچ (بسر) کا 74 واں اجلاس اختتام پذیر ہوگیا، جس میں فیکلٹی آف عریبک اینڈ اسلامک سٹڈیز اور فیکلٹی آف سوشل سائنسز سے تعلق رکھنے والے 32 پی ایچ ڈی سکالرز نے اپنے تحقیقی سائناپسز پیش کیے۔اجلاس کی صدارت ڈائریکٹر بسر پروفیسر ڈاکٹر ارشاد احمد ارشد نے کی جبکہ یونیورسٹی کے ڈینز، معروف اساتذہ اور متعلقہ شعبوں کے ماہرین نےشرکت کی۔

اجلاس کے دوران سکالرز کے تحقیقی معیار، اعتماد اور موضوعات کے تنوع کو سراہا گیا۔ زیادہ تر سائناپسز کو فوری منظوری دے دی گئی جبکہ چند کو مزید بہتری کے لیے مفید تجاویز کے ساتھ واپس بھیجا گیا۔شرکا نے اس امر پر اطمینان کا اظہار کیا کہ پیش کیے گئے تحقیقی موضوعات پاکستان کے سماجی، تعلیمی اور معاشی چیلنجز سے گہری مطابقت رکھتے ہیں۔

(جاری ہے)

فیکلٹی آف سوشل سائنسز کے ڈین پروفیسر ڈاکٹر عبدالعزیز ساحر نے کہا کہ وائس چانسلر پروفیسر ڈاکٹر ناصر محمود کی بصیرت افروز قیادت میں علامہ اقبال اوپن یونیورسٹی تحقیق کے عالمی معیار کو اپنانے اور اسے براہ راست قومی سماجی و اقتصادی ترجیحات سے ہم آہنگ کرنے کے لیےاقدامات کر رہی ہے۔

یونیورسٹی اس بات کو یقینی بنا رہی ہے کہ تحقیقی منصوبے نہ صرف علمی دنیا میں قدر کی نگاہ سے دیکھے جائیں بلکہ معاشرے کی عملی ضروریات کو بھی پورا کریں۔وائس چانسلر کی ہدایات کے مطابق بسر اجلاس باقاعدگی سے منعقد کیے جا رہے ہیں تاکہ تحقیقی سرگرمیوں میں تسلسل اور معیار کو برقرار رکھا جا سکے۔ اجلاس کی معاون ٹیم میں بسر کے ایڈیشنل ڈائریکٹر ڈاکٹر ظفر اقبال، ڈپٹی رجسٹرار ڈاکٹر شکیل احمد اور دیگر عملہ شامل تھا جن کی پیشہ ورانہ کاوشوں کو بھی سراہا گیا۔