چیئرمین سینیٹ سے وزیر مملکت برائے مذہبی امور و بین المذاہب ہم آہنگی کھیل داس کوہستانی سمیت اہم شخصیات کی ملاقات

بدھ 13 اگست 2025 20:25

اسلام آباد(اُردو پوائنٹ اخبارتازہ ترین - این این آئی۔ 13 اگست2025ء)چیئرمین سینیٹ سید یوسف رضا گیلانی سے وزیر مملکت برائے مذہبی امور و بین المذاہب ہم آہنگی، کھیل داس کوہستانی سمیت اہم سیاسی شخصیات نے ان کی سرکاری رہائشگاہ پر چچا زاد بھائی مرحوم سید تنویر الحسن گیلانی کے انتقال پر تعزیت کا اظہار کرتے ہوئے گہرے دکھ اور افسوس کا اظہار کیا۔

(جاری ہے)

انہوں نے مرحوم کیلئے مغفرت، درجات کی بلندی اور لواحقین کیلئے صبر جمیل کی دعا کی اور کہا کہ چیئرمین سینیٹ اور مرحوم کے لواحقین کے دکھ کی اس مشکل گھڑی میں وہ ان کے شانہ بشانہ کھڑے ہیں۔انہوں نے کہا کہ مرحوم ایک نیک سیرت اور باوقار انسان تھے جنہوں نے اپنی زندگی عوام کی خدمت کے لیے وقف کردی تھی۔ چیئرمین سینیٹ سید یوسف رضا گیلانی نے شکریہ ادا کرتے ہوئے کہا کہ مرحوم سید تنویر الحسن گیلانی ایک محبِ وطن، مخلص اور خدمت گزار شخصیت تھے جنہوں نے ہمیشہ ملک و قوم کے مفاد کو مقدم رکھا۔