پاکستان بلا شبہ برصغیر کے مسلمانوں کی طویل جدوجہد اور عظیم قربانیوں کا ثمر ہے، وزیر اعلیٰ خیبر پختونخوا

پشاور (اُردو پوائنٹ اخبارتازہ ترین - اے پی پی۔ 13 اگست2025ء) وزیر اعلیٰ خیبر پختونخوا علی امین خان گنڈاپور قوم باالخصوص خیبرپختونخوا کے عوام کو جشن پاکستان کی دلی مبارکباد دیتے ہوئے کہا ہے کہ 14 اگست جشن پاکستان مملکت خدادادکی بقاءو سلامتی اور اس کی ترقی و خوشحالی کےلئے تجدیدِ عہد کا دن ہے۔ انہوں نے کہا کہ پاکستان بلا شبہ برصغیر کے مسلمانوں کی ایک طویل جدوجہد اور عظیم قربانیوں کا ثمر ہے، آج ہم اپنے اسلاف کی ان قربانیوں اور جدو جہد کو خراج عقیدت پیش کرتے ہیں اور اس عزم کا اعادہ کرتے ہیں کہ ہم وطن عزیز کو ایک عظیم ملک بنانے کےلئے ان نظریات پر کار بند رہیں گے جو اس مملکت خداداد کے حصول کی بنیاد ہیں۔

78 ویں جشن پاکستان کے موقع پر جاری اپنے ایک پیغام میں وزیر اعلیٰ خیبر پختونخوا نے کہا ہے کہ اس بار 14 اگست پر معرکہ حق (آپریشن بنیان مرصوص) کا جشن بھی منایا جارہا ہے جس سے جشن آزادی کی خوشیاں دوبالا ہو گئی ہیں۔

(جاری ہے)

انہوں نے پاکستان کی مسلح افواج کومعرکہ حق کی تاریخی کامیابی پر بھی زبردست خراج تحسین پیش کرتے ہوئے کہا ہے کہ بزدل دشمن کے خلاف یہ فتح ہماری مسلح افواج کی پیشہ ورانہ مہارت اور شاندار حکمت عملی کا واضح ثبوت ہے۔

ہم ان شہداءکو بھی خراج عقیدت پیش کرتے ہیں جن کی قربانیوں نے اس فتح کی راہ ہموار کی ، ان کا جذبہ ایمانی ، بلند حوصلہ اور غیر متزلز ل عزم وطن عزیز کی بقاءو سلامتی اور تحفظ کیلئے یکجا رہنے کا جذبہ پیدا کرتا ہے۔ آپریشن معرکہ حق ملی اتحاد و اتفاق کا عملی مظاہرہ تھا جس نے دشمن پر واضح کر دیا کہ ہم اپنی جغرافیائی حدود کی حفاظت کرنا بخوبی جانتے ہیں اور دشمن کی کسی بھی سازش یا حملے کا موثر جواب دینے کی بھر پور صلاحیت رکھتے ہیں۔

علی امین گنڈا پور نے کہا کہ پاکستان کا قیام لاکھوں مسلمانوں کی قربانیوں کا نتیجہ ہے جن کی وجہ سے آج ہم پرامن فضا میں سانس لے رہے ہیں۔ یہ بلاشبہ ہمارے اسلاف کا ہم پر ایک عظیم احسان ہے، اس لئے اب اس مملکت خداداد کو حقیقی معنوں میں ایک آ زاد فلاحی ریاست اور ترقیافتہ ملک بنانا ہم سب کا اجتماعی فریضہ ہے۔ اس مقصد کیلئے معاشرے کے تمام طبقات کو اپنا کردار ادا کرنا ہوگا۔

انہوں نے کہا کہ وطن سے محبت کا اولین تقاضا ہے کہ ہم علاقائی ، نسلی اورلسانی امتیازات اور تمام تر ذاتی وابستگیوں سے بالاتر ہو کر ملک کی حقیقی آزادی اور ترقی کیلئے یکجا ہو جائیں۔ہم آزادی کیلئے پیش کی گئی لاکھوں قربانیوں کی قیمت تو نہیں چکاسکتے البتہ آزادی کے حقیقی مقاصد حاصل کرکے اپنے اسلاف کے خواب کو شرمندہ تعبیر کر سکتے ہیں۔ اس مقصد کےلئے ملک کو داخلی ، خارجی اور مالی بحرانوں سے نکالنے اور معاشی استحکام کیلئے ایک آزادانہ اور دیرپا حکمتِ عملی کی ضرورت ہے کیونکہ مالی خودکفالت اور معاشی استحکام ناقابل تسخیر قومی دفاع کیلئے ناگزیر ہے۔

آئیں آج کے دن ہم سب اس عہد کی تجدید کریں کہ ہم قائداعظم کے وژن کے مطابق پاکستان کو ایک عظیم ملک بنانے کےلئے اپنا کردار بطریق احسن ادا کریں گے اور ہم قومی مفادات کو سیاسی اور ذاتی مفادات پر ترجیح دیں گے۔ اس موقع پر وزیر اعلیٰ نے تحریک آزادی کے شہداءسمیت پاکستان کے دفاع و سلامتی کیلئے اپنی جانوں کا نذرانہ پیش کرنے والے تمام شہداءکو خراج عقیدت پیش کیا ہے۔