کراچی میں یوم آزادی پر ہوائی فائرنگ؛ کمسن بچی سمیت 3 افراد جاں بحق، 100 سے زائد زخمی

مختلف واقعات میں زخمی ہونے والے 109 افراد کو 3 بڑے ہسپتالوں میں لایا گیا جن میں سے 3 کی حالت تشویشناک بتائی گئی

ساجد علی جمعرات 14 اگست 2025 13:05

کراچی میں یوم آزادی پر ہوائی فائرنگ؛ کمسن بچی سمیت 3 افراد جاں بحق، ..

کراچی ( اُردو پوائنٹ اخبارتازہ ترین۔ 14 اگست 2025ء ) صوبہ سندھ کے دارالحکومت کراچی میں یومِ آزادی کی خوشی میں ہوائی فائرنگ کے واقعات میں ایک کم عمر بچی سمیت 3 افراد جاں بحق اور 100 سے زائد زخمی ہوگئے۔ میڈیا رپورٹس کے مطابق یومِ آزادی پر شہرِ قائد کے مختلف علاقوں سے ہوائی فائرنگ میں گولی لگنے سے زخمی 109 افراد کو 3 بڑے ہسپتالوں میں لایا گیا جن میں سے 3 کی حالت تشویشناک بتائی گئی، عزیز آباد تھانے کے ایس ایچ او وقار قیصر نے بتایا کہ عزیز آباد بلاک 8 میں 7 سالہ بچی اپنے گھر کی دوسری منزل کی گیلری سے یومِ آزادی کی آتش بازی دیکھ رہی تھی کہ ایک گولی اس کے سر میں جا لگی۔

انہوں نے بتایا کہ بچی کی والدہ اور اس کے ماموں بچی کو لے کر قریبی نجی ہسپتال پہنچے جہاں ڈاکٹروں نے اسے مردہ قرار دے دیا بعد ازاں لاش عباسی شہید ہسپتال منتقل کی گئی جہاں اس کے سر سے گولی نکالی گئی، گولی 9 ایم ایم پستول سے چلائی گئی تھی، پولیس نے ہوائی فائرنگ میں ملوث 4 ملزمان کو گرفتار کرکے ان سے دو 9 ایم ایم پستول برآمد کرلی ہیں جنہیں فرانزک ٹیسٹ کے لیے بھیجا جائے گا تاکہ پتہ چل سکے کہ آیا یہ ہتھیار قتل میں استعمال ہوئے تھے یا نہیں۔

(جاری ہے)

بتایا گیا ہے کہ کورنگی نمبر 3 کے ماڈل فیملی پارک میں ایک 35 سالہ شخص کو اندھی گولی لگی جس سے وہ جاں بحق ہوگیا جس کی لاش قانونی کارروائی کے لیے جناح پوسٹ گریجویٹ میڈیکل سینٹر منتقل کر دی گئی اور واقعے کی مزید تحقیقات کا آغاز کردیا گیا جب کہ ایسا ہی ایک واقعہ کلری کے علاقے میں ابراہیم مسجد کے قریب آگرہ تاج کالونی میں پیش آیا جہاں ضلع جنوبی کے ڈپٹی انسپکٹر جنرل سید اسد رضا نے بتایا کہ 70 سالہ شخص اپنے گھر کے باہر بیٹھا تھا کہ اسے اندھی گولی لگ گئی، زخمی کو سول ہسپتال کراچی منتقل کیا گیا لیکن وہ جاںبر نہ ہوسکا دورانِ علاج خالق حقیقی سے جا ملا۔