پاکستان اور مائکرونیشیا کے درمیان سفارتی تعلقات قائم

جمعہ 15 اگست 2025 11:00

نیویارک (اُردو پوائنٹ اخبارتازہ ترین - اے پی پی۔ 15 اگست2025ء) پاکستان اور مغربی بحرالکاہل میں واقع جزیرہ نما ملک مائکرونیشیا نے نیویارک میں ایک باقاعدہ تقریب کے دوران سفارتی تعلقات قائم کر لئے ۔اس موقع پر پاکستان کے اقوامِ متحدہ میں مستقل مندوب سفیر عاصم افتخار احمد اور مائکرونیشیا کے مستقل مندوب سفیر جیم ایس لپوے نے مشترکہ اعلامیہ پر دستخط کئے ۔

تقریب اقوام متحدہ میں پاکستان کے مشن میں منعقد ہوئی، جس میں دونوں ممالک کے سفارتکاروں نے شرکت کی، جن میں پاکستان کے نائب مستقل مندوب سفیر عثمان جدون بھی شامل تھے۔سفیر عاصم افتخار احمد نے اس موقع پر کہا کہ انہیں خوشی ہے کہ یہ سفارتی تعلقات یومِ آزادی پاکستان کے موقع پر قائم ہو رہے ہیں، جو دونوں ممالک کے درمیان خصوصاً انسانی وسائل کی ترقی، استعداد کار میں اضافے اور ماحولیاتی تبدیلی جیسے اہم شعبوں میں تعاون کے نئے مواقع پیدا کریں گے۔

(جاری ہے)

انہوں نے اس امر پر بھی مسرت کا اظہار کیا کہ پاکستان وہ 100واں ملک ہے جس کے ساتھ مائکرونیشیا نے سفارتی تعلقات قائم کئے ہیں ، دوسری جانب، سفیر جیم ایس لپوے نے اس نئے سفارتی باب کے آغاز پر خوشی کا اظہار کرتے ہوئے کہا کہ وہ پاکستان کے ساتھ دوستی اور شراکت داری کے سفر کے آغاز پر فخر محسوس کر رہے ہیں۔ انہوں نے اقوامِ متحدہ کے دفاتر کے قیام میں معاونت پر پاکستان کا شکریہ ادا کیا اور مستقبل میں قریبی تعاون کی امید ظاہر کی۔ ساتھ ہی انہوں نے یومِ آزادی پاکستان پر مبارکباد بھی پیش کی۔تقریب سے قبل دونوں سفرا کے درمیان مختصر ملاقات بھی ہوئی، جس میں دو طرفہ اور اقوام متحدہ کے پلیٹ فارم پر ممکنہ تعاون کے پہلوؤں پر تبادلہ خیال کیا گیا۔