Live Updates

شیری رحمان کا باجوڑ میں سیلابی تباہی اور مظفرآباد میں کلاؤڈ برسٹ کے نتیجے میں قیمتی جانوں کے ضیاع پر اظہار افسوس

ماحولیاتی تبدیلی ہمارے دروازے پر دستک دے رہی ہے، فوری اور سنجیدہ اقدامات ناگزیر ہیں، سابق وزیر کا بیان

جمعہ 15 اگست 2025 14:30

اسلام آباد(اُردو پوائنٹ اخبارتازہ ترین - این این آئی۔ 15 اگست2025ء)نائب صدر پیپلز پارٹی سینیٹر شیری رحمان نے باجوڑ میں سیلابی تباہی اور مظفرآباد میں کلاؤڈ برسٹ کے نتیجے میں قیمتی جانوں کے ضیاع پر اظہار افسوس کرتے ہوئے کہا ہے کہ ماحولیاتی تبدیلی ہمارے دروازے پر دستک دے رہی ہے، فوری اور سنجیدہ اقدامات ناگزیر ہیں۔ اپنے بیان میں شیری رحمن نے کہاکہ باجوڑ اور مظفر آباد میں ایک اور سیلابی ریلہ تباہی لے آیا، متاثرہ خاندانوں کے ساتھ دلی ہمدردی ہے، لاپتہ افراد کی بحفاظت واپسی کیلئے دعاگو ہیں۔

انہوںنے کہاکہ سیلاب اور کلاؤڈ برسٹ جیسے واقعات اب غیر معمولی نہیں رہے، یہ آئے روز سنگین ہوتے چلے جار ہے ہیں ۔ شیری رحمن نے کہاکہ ماحولیاتی تبدیلی ہمارے دروازے پر دستک دے رہی ہے، فوری اور سنجیدہ اقدامات ناگزیر ہیں،کھلے آسمان تلے بے یارو مددگار متاثرین کے لیے فوری ریلیف اور بحالی کا عمل تیز کریں۔

(جاری ہے)

شیری رحمن نے کہاکہ یہ صرف موسم کی تبدیلی نہیں، یہ انسانی المیے کا آغاز ہے، ہمیں بحیثیت قوم بیدار ہونا ہوگا ۔

شیری رحمن نے کہاکہ ہر سانحے کے بعد افسوس کافی نہیں، ہمیں پیشگی تیاری، پالیسی اور عملی اقدامات کی طرف جانا ہوگا ۔ انہوںنے کہاکہ آبادیوں کا تحفظ، بنیادی ڈھانچے کی بہتری اور موسمیاتی خطرات سے نمٹنے کی حکمت عملی وقت کی ضرورت ہے۔ شیری رحمن نے کہاکہ غریب اور پسماندہ علاقے ماحولیاتی آفات کا پہلا نشانہ بنتے ہیں، ان کیلئے ترجیحی بنیادوں پر اقدامات کیے جائیں ۔ انہوںنے کہاکہ ریسکیو اور ریلیف ٹیموں کی کاوشیں قابل تعریف ہیں، مگر ان کے وسائل بڑھانا ریاست کی ذمہ داری ہے ۔ سابق وزیر نے کہا کہ ماحولیاتی تبدیلیوں کو نظر انداز کر کے ہم اپنی بقاء کے دروازے خود بند کر رہے ہیں۔