بیرسٹر گوہر کا بونیر میں ہیلی کاپٹر سروس اور ضلع کو آفت زدہ علاقہ قرار دینے کا مطالبہ

جمعہ 15 اگست 2025 18:28

اسلام آباد (اُردو پوائنٹ اخبارتازہ ترین - این این آئی۔ 15 اگست2025ء)چیئرمین پی ٹی آئی بیرسٹر گوہر نے بونیر میں سیلابی صورتحال کے باعث ہیلی کاپٹر سروس اور وفاقی و صوبائی حکومت سے ضلع کو آفت زدہ علاقہ قرار دینے کا مطالبہ کردیا۔میڈیا سے گفتگو کرتے ہوئے بیرسٹر گوہر نے کہا کہ اس وقت صوبہ خیبرپختونخوا سیلاب کی زد میں ہے، مختلف علاقے سیلاب سے متاثر ہوئے ہیں، بونیر کے کئی علاقوں میں گھروں کو نقصان پہنچا ہے ،جانور اور گاڑیاں سیلاب میں بہہ گئی ہیں۔

(جاری ہے)

انہوں نے کہا کہ بونیر کے ارکان اسمبلی اور ضلعی انتظامیہ سے رابطہ کیا ہے، ضلعی انتظامیہ کے افسران فیلڈ میں موجود ہیں، ہیلی کاپٹر سروس کا مطالبہ کیا ہے، دو مقامات پر ریسکیو خدمات انجام دیں گے۔بیرسٹر گوہر نے بتایا کہ متاثرہ اضلاع میں ریسکیو آپریشن شروع کردیے ہیں، ہسپتالوں میں ایمرجنسی نافذ کردی گئی ہے اور متعلقہ اداروں میں اسٹاف کی چھٹیاں منسوخ کردی گئی ہیں۔انہوںنے کہاکہ عوام سے اپیل ہے کہ حوصلہ رکھیں اور ایک دوسرے کا ساتھ دیں۔ ریسکیو آپریشن میں شہری ساتھ دیں، صوبائی حکومت آپ کے ساتھ ہے۔ سیاست سے بالاتر ہو کر نقصانات کا ازالہ اور خدمات سر انجام دینی ہیں۔