بلوچستان ہائی کورٹ ،صوبے میں پبلک ٹرانسپورٹ کی معطلی بارے جاری نوٹیفکیشن فوری واپس ،موبائل انٹرنیٹ بحال کرنے کا حکم

جمعہ 15 اگست 2025 18:53

کوئٹہ(اُردو پوائنٹ اخبارتازہ ترین - این این آئی۔ 15 اگست2025ء) بلوچستان ہائی کورٹ نے صوبے میں پبلک ٹرانسپورٹ کی معطلی کے بارے میں جاری نوٹفکیشن فوری واپس لینے اور سیکورٹی خدشات کے علاوہ صوبے کے دیگر علاقوں میں فوری موبائل انٹرنیٹ بحال کرنیکا حکم دے دیا ۔ جمعہ کو بلوچستان ہائی کورٹ کے چیف جسٹس جسٹس روزی خان بڑیچ، جسٹس سردار احمد حلیمی نے صوبے میں موبائل انٹرنیٹ کی بندش کیخلاف دائر پٹیشن پر سماعت کی ۔

سماعت کے دوران ایڈووکیٹ جنرل بلوچستان، ایڈیشنل اٹارنی جنرل، اور محکمہ داخلہ کے افسران پیش ہوئے ۔ حکومتی حکام نے عدالت کو بتایا کہ پبلک ٹرانسپورٹ سروسز عارضی طور پر معطل کی گئی ہیں، حکومت بلوچستان نے صوبے بھر میں 31 اگست 2025 تک موبائل ڈیٹا بند رکھنے کا فیصلہ کیا ہے چہلم کے جلوس کے موقع پر سیکیورٹی خدشات کے پیش نظر موبائل سروسز معطل ہیں ۔

(جاری ہے)

عدالت نے حکام سے استفسار کیا کہ کیا سیکیورٹی خطرات پورے بلوچستان میں ہیں جس پر ایڈوکیٹ جنرل اور ایڈیشل چیف سیکرٹری کا عدالت کو جواب دیا کہ سیکیورٹی خدشات صرف کچھ مخصوص علاقوں میں ہیں ‘ عدالت نے حکومت بلوچستان کو حکم دیا کہ پبلک ٹرانسپورٹ معطلی کا حکم فوراً واپس لیا جائے جبکہ جہاں سیکیورٹی خدشات موجود نہیں ہیں، وہاں موبائل فون نیٹ ورکس اور ڈیٹا سروسز فوری طور پر بحال کی جائیں۔عدالت نے حکم دیا کہ حکومت اپنے 31 اگست تک بندش کے فیصلے پر نظرثانی کرے۔بعدازاں کیس کی سماعت 21 اگست 2025 تک ملتوی کردی گئی ۔