پنجاب محتسب کا عوامی خدمت پروگرام اگلے ہفتے ملتان سے شروع ہوگا

جمعہ 15 اگست 2025 20:00

لاہور(اُردو پوائنٹ اخبارتازہ ترین - آن لائن۔ 15 اگست2025ء)صوبائی محتسب پنجاب کے زیرِ نگرانی ’’عوامی خدمت پروگرام‘‘ کا آغاز اگلے ہفتے محتسب کے ریجنل آفس ملتان سے کیا جائے گا۔ اس منصوبے کا مقصد عوام کو سہولیات کی فراہمی، آگاہی میں اضافہ اور سرکاری اداروں میں بدانتظامی کے خاتمے کے لیے مؤثر اقدامات کو یقینی بنانا ہے۔

(جاری ہے)

پروگرام کے تحت ایک خصوصی موبائل وین تیار کی گئی ہے جو جدید ڈیجیٹل سہولیات سے آراستہ ہے۔

یہ وین موقع پر ہی شکایات درج کرے گی اور شکایت کنندگان کو رہنمائی فراہم کرے گی۔صوبائی محتسب کے دفتر کے مطابق اس اقدام سے جنوبی پنجاب کے پسماندہ اور دور دراز علاقوں کے عوام کو شکایات کے فوری اور شفاف ازالے کی سہولت میسر آئے گی، جس سے محتسب کا نظام زیادہ مؤثر اور قابل رسائی ہو جائے گا۔