شمالی علاقہ جات میں شدید بارشیں، عبدالعلیم خان کا متعدد افراد کے جاں بحق ہونے پر افسوس کا اظہار

این ایچ اے متاثرہ علاقوں میں شاہرائوں کی فوری بحالی یقینی بنائے، چیئرمین این ایچ اے ،سینئر افسران موقع پر صورتحال بہترکریں، ہدایت

جمعہ 15 اگست 2025 21:10

اسلام آباد (اُردو پوائنٹ اخبارتازہ ترین - این این آئی۔ 15 اگست2025ء)وزیر مواصلات عبدالعلیم خان نے شمالی علاقہ جات میں شدید بارشوں کے پیش نظر حکام کو اہم ہدایات جاری کرتے ہوئے کہا کہ این ایچ اے متاثرہ علاقوں میں شاہراہوں کی فوری بحالی یقینی بنائے، چیئرمین این ایچ اے اور سینئر افسران موقع پر صورتحال بہترکریں۔

(جاری ہے)

تفصیلات کے مطابق عبدالعلیم خان نے بونیرمیں متعدد افراد کے جاں بحق ہونے پر افسوس کا اظہار کرتے ہوئے کہا ہے کہ مون سون کی تازہ لہرسے صورتحال پریشان کن ہو چکی ہے، جہاں سڑکیں بندہیں وہاں متبادل راستوں سے ٹریفک بحال کریں، این ایچ اے لینڈ سلائیڈنگ ہٹانے کیلئے بھی ہنگامی اقدامات کرے، سکردو، جگلوٹ اورملحقہ علاقوں میں بھی این ایچ اے ٹیمیں کام کریں، گلگت بلتستان میں بحالی کے اقدامات کی جلد از جلد رپورٹ پیش کریں۔

وفاقی وزیر مواصلات نے شہریوں کو خبردار رکھنے اور امدادی سرگرمیاں یقینی بنانے کی ہدایت کی اور کہا کہ مشکل کی اس گھڑی میں مسافروں کی ہرممکن مددکی جائے، صورتحال کی بہتری کیلئے این ایچ اے تمام وسائل بروئے کارلائے۔