کراچی، بارہویں جماعت سائنس پری انجینئرنگ گروپ کے نتائج کا اعلان، پہلی تینوں پوزیشنز پر طالبات کا قبضہ

ہفتہ 16 اگست 2025 20:00

کراچی (اُردو پوائنٹ اخبارتازہ ترین - این این آئی۔ 16 اگست2025ء)اعلیٰ ثانوی تعلیمی بورڈ کراچی نے انٹرمیڈیٹ بارہویں جماعت سائنس پری انجینئرنگ گروپ کے سالانہ امتحانات برائے 2025ء کے نتائج کا اعلان کردیا ہے۔چیئرمین انٹربورڈ کراچی فقیر محمد لاکھو نے نتائج کا اعلان کرتے ہوئے بتایا کہ سائنس پری انجینئرنگ گروپ کے امتحانات میں پہلی تینوں پوزیشنز طالبات نے حاصل کیں جب کہ پہلی پوزیشن مشترکہ طور پر 2 طالبات نے حاصل کی۔

انہوں نے بتایا کہ مشترکہ طور پر پہلی پوزیشن حاصل کرنے والی طالبہ لائبہ انصاری اور سیدہ عنزیلہ حیدر زیدی نے 1100میں سے 1019 نمبرز حاصل کیے۔ آئزل مرحا نے 1014 نمبرز اور اے ون گریڈ کے ساتھ دوسری پوزیشن جب کہ حفصہ عمران نے 1010 نمبرز حاصل کر کے تیسری پوزیشن اپنے نام کی۔

(جاری ہے)

ناظم امتحانات زرینہ راشد نے نتائج کی تفصیلات بتاتے ہوئے کہا کہ سائنس پری انجینئرنگ گروپ کے امتحانات میں 21 ہزار 617 امیدواروں نے رجسٹریشن حاصل کی جب کہ 21 ہزار 19 امیدوار امتحانات میں شریک ہوئے جس میں سے 11 ہزار 547 امیدوار کامیاب قرار پائے اس طرح کامیابی کا تناسب 54.94 فیصد رہا۔

امتحانات میں ایک ہزار 35 امیدواروں نے اے ون گریڈ، ایک ہزار 762 نے اے گریڈ، 2 ہزار 351نے بی گریڈ اور 2 ہزار 938 نے سی گریڈ حاصل کیا، طلبا اپنے نتائج اعلیٰ ثانوی تعلیمی بورڈ کراچی کی ویب سائٹ اور آفیشل اینڈرائڈ ایپ پر بھی دیکھ سکتے ہیں۔چیئرمین فقیر محمد لاکھو نے کامیاب ہونے والی طالبات کو مبارکباد دیتے ہوئے کہا ہے کہ انٹرمیڈیٹ کے تمام گروپس کے نتائج کے اعلان کے بعد پوزیشن ہولڈرز طلبہ کی حوصلہ افزائی کیلئے ان کے اعزاز میں تقریب منعقد کی جائے گی۔