برطانیہ میں پاکستانی کمیونٹی کا جوش و خروش سے 78واں یومِ آزادی اور معرکۂ حق کی کامیابی کا جشن

اتوار 17 اگست 2025 00:00

اسلام آباد (اُردو پوائنٹ اخبارتازہ ترین - اے پی پی۔ 17 اگست2025ء) برطانیہ میں مقیم پاکستانی کمیونٹی نے پاکستان کا 78واں یومِ آزادی اور "معرکۂ حق" بڑی جوش و خروش سے منایا۔ اس سلسلے میں ایک شاندار تقریب جامعہ اسلامیہ غوثیہ ٹرسٹ کے چیئرمین علامہ قاضی عبدالعزیز چشتی (ایم بی ای) کی میزبانی میں لُوٹن میں منعقد ہوئی۔تقریب کے مہمانِ خصوصی پاکستان کے ہائی کمشنر برائے برطانیہ ڈاکٹر محمد فیصل تھے۔

تقریب میں بڑی تعداد میں ارکانِ پارلیمنٹ، میئرز، کونسلرز، پروفیشنلز، مذہبی و سماجی رہنما، علماء کرام، طلباء، میڈیا نمائندگان اور ہائی کمیشن کے افسران نے شرکت کی۔اپنے خطاب میں ڈاکٹر محمد فیصل نے پاکستان کو خراجِ عقیدت پیش کرتے ہوئے ان کی قربانیوں کو یاد کیا جن کی بدولت برصغیر کے مسلمانوں کو آزادی نصیب ہوئی۔

(جاری ہے)

انہوں نے کہا کہ اب ہر پاکستانی کی ذمہ داری ہے کہ وہ ملک کو مضبوط بنائے اور آنے والی نسلوں کے لیے ایک روشن مستقبل کی بنیاد رکھے۔

ہائی کمشنر نے "آپریشن بنیان مرصوص" اور "معرکۂ حق" میں پاکستانی افواج کی کامیابی کو سراہا اور کہا کہ پوری قوم اور بیرونِ ملک مقیم پاکستانی، افواجِ پاکستان کے شانہ بشانہ کھڑے رہے۔ انہوں نے خصوصاً نوجوان برٹش پاکستانیوں، بالخصوص خواتین، کی جشنِ آزادی میں بھرپور شرکت کو سراہا۔تقریب سے دیگر مقررین نے بھی خطاب کیا اور بانی پاکستان کو خراجِ عقیدت پیش کیا۔ انہوں نے مشکل وقت میں قوم کی یکجہتی، افواج، سیاسی قیادت اور میڈیا کے مثبت کردار کو سراہا۔لُوٹن کے میئرز اور کونسلرز نے برٹش پاکستانی کمیونٹی کی سماجی و اقتصادی خدمات کو خراج تحسین پیش کیا۔تقریب کا اختتام کیک کاٹنے کی تقریب سے ہوا جس میں ہائی کمشنر، علامہ عبدالعزیز چشتی اور دیگر معزز مہمانوں نے شرکت کی۔