Live Updates

سٹی ٹریفک پولیس مری نے سیاحوں کے لیے خصوصی ٹریفک ایڈوائزری جاری کر دی

اتوار 17 اگست 2025 17:10

راولپنڈی (اُردو پوائنٹ اخبارتازہ ترین - اے پی پی۔ 17 اگست2025ء) سٹی ٹریفک پولیس مری نے مری جانے والے سیاحوں کے لیے خصوصی ٹریفک ایڈوائزری جاری کر دی ہے۔ چیف ٹریفک آفیسر مری وسیم اختر نے ہدایت کی ہے کہ حالیہ بارشوں کے پیش نظر سیاح پہاڑی علاقوں کے غیر ضروری سفر سے گریز کریں۔ ایڈوائزری میں کہا گیا ہے کہ بارش کے دوران گاڑی کی رفتار کم رکھی جائے اور دوران ڈرائیونگ جلد بازی یا ڈبل لائن بنانے سے اجتناب کیا جائے۔

مری میں دو طرفہ ٹریفک چلنے کے باعث غلط اوور ٹیکنگ سے پرہیز کرنے اور گاڑیاں صرف محفوظ اور مختص جگہوں پر پارک کرنے کی ہدایت کی گئی ہے۔ ترجمان ٹریفک پولیس کے مطابق چیف ٹریفک آفیسر وسیم اختر اور ڈی ایس پی ٹریفک مری خود فیلڈ میں موجود ہیں جبکہ سیاحوں کی سہولت کے لیے اضافی نفری بھی تعینات کر دی گئی ہے۔

(جاری ہے)

سی ٹی او مری نے کہا کہ حالیہ بارشوں کے بعد لینڈ سلائیڈنگ کے خدشات موجود ہیں اس لیے شہری غیر ضروری سفر نہ کریں۔

شدید بارش اور ممکنہ دھند کی صورت میں فوگ لائٹس اور ڈبل اشاروں کا استعمال لازمی کیا جائے۔ انہوں نے کہا کہ سیاح لینڈ سلائیڈنگ یا دیگر ہنگامی صورتحال میں ڈائیورشن پوائنٹس پر تعینات ٹریفک عملے سے تعاون کریں۔ کسی بھی ایمرجنسی کی صورت میں شہری ٹریفک کنٹرول نمبر 9269200-051 پر رابطہ کر سکتے ہیں۔