وفاقی وزیرداخلہ محسن نقوی کی ہدایت پر فیڈرل ریزرو پولیس کی ٹیمیں سوات کے سیلاب متاثرین کی مدد کیلئے سرگرم

اتوار 17 اگست 2025 18:00

اسلام آباد (اُردو پوائنٹ اخبارتازہ ترین - اے پی پی۔ 17 اگست2025ء) وفاقی وزیرداخلہ محسن نقوی کی ہدایت پر فیڈرل ریزرو پولیس کی ٹیمیں سوات کے سیلاب متاثرین کی مدد کے لیے سرگرم ہیں۔ فیڈرل ریزرو پولیس کی ڈسٹرکٹ آفیسر ماریہ کی سربراہی میں سوات کے متاثرہ علاقوں میں ریسکیو اینڈ ریلیف آپریشن جاری ہے۔یہاں جاری بیان کے مطابق کمانڈنٹ فیڈرل ریزرو پولیس ریاض نذیر گاڑا کی قیادت میں فورس کی ٹیمیں مختلف متاثرہ علاقوں میں ریسکیو اینڈ ریلیف آپریشن میں مصروف ہیں،فیڈرل ریزرو پولیس کے جوانوں نے متعدد متاثرین کو ریسکیو کیا۔

(جاری ہے)

فیڈرل ریزرو پولیس کی میڈیکل ٹیمیں بھی طبی امداد فراہم کر رہی ہیں۔وزیرداخلہ محسن نقوی کی ہدایت پر فیڈرل ریزرو پولیس کی ٹیموں نےمتاثرہ لوگوں کو محفوظ پر منتقل کیا۔وزیرداخلہ محسن نقوی نے کمانڈنٹ فیڈرل ریزرو پولیس ریاض نذیر گاڑا، ڈسٹرکٹ آفیسر سوات ماریہ اور انکی ٹیم کے عزم اور جذبے کو سراہا۔ محسن نقوی نے متاثرین کو مناسب رہائش اور 3 وقت کے کھانے کی فراہمی یقینی بنانے کی ہدایت کرتے ہوئے کہا کہ مشکل کی گھڑی میں فیڈرل ریزرو پولیس کے جوان متاثرہ بہن بھائیوں کے ساتھ کھڑے ہیں،متاثرہ لوگوں کا اپنے خاندان کی طرح خیال رکھا جائے۔