حکومت پاکستان کا ممتاز معالج ڈاکٹر منصور میمن کو ان کی خدمات کے اعتراف میں تمغہ امتیاز سے نوازنے کا اعلان

اتوار 17 اگست 2025 21:20

کراچی(اُردو پوائنٹ اخبارتازہ ترین - این این آئی۔ 17 اگست2025ء) حکومت پاکستان نے ممتاز معالج، انسان دوست اور ثقافتی سفیر ڈاکٹر منصور میمن کو قوم کی طویل خدمات کے اعتراف میں تمغہ امتیاز سے نوازنے کا اعلان کیا ہے۔ ایوارڈ دینے کا اعلان یوم آزادی، 14 اگست 2025 کو کیا گیا انہیں یہ ایوارڈ باقاعدہ طور پر 23 مارچ 2026 کو یوم پاکستان کے موقع پر پیش کیا جائے گا۔

(جاری ہے)

ڈاکٹر میمن کو دنیا بھر میں پاکستان کا "ایمبیسیڈر ایٹ لارج" کہا جاتا ہے، کیونکہ انہوں نے ملک کی مثبت تصویر اجاگر کرنے میں نمایاں خدمات انجام دی ہیں۔ ان کا سفر وژنری قیادت اور عوامی خدمت سے غیر متزلزل وابستگی کا روشن نمونہ ہے۔ وہ آغا خان یونیورسٹی آف ہیلتھ سائنسز(مارچ 1992)کے گریجویٹ ہیں اور معالج، محقق، فلاحی شخصیت اور رہنما کی حیثیت سے بین الاقوامی شہرت حاصل کر چکے ہیں۔ڈاکٹر منصور میمن کی زندگی بہترین کارکردگی، ہمدردی اور حب الوطنی کی درخشاں مثال ہے۔تمغہ امتیازان کی خدمات کا بہترین اعتراف ہے اور آنے والی نسلوں کے لیے مشعلِ راہ ہے۔