صوابی میں بھی کلاؤڈبرسٹ کی اطلاعات، درجنوں گھر ڈوب گئے، 15 افراد جاں بحق

صوابی ( اُردو پوائنٹ اخبارتازہ ترین۔ 18 اگست 2025ء ) صوبہ خیبرپختونخواہ کے علاقہ صوابی میں بھی کلاؤڈ برسٹ نے تباہی مچادی جہاں درجنوں گھر زیرِآب آنے اور 15 افراد کے جاں بحق ہونے کی اطلاعات موصول ہوئی ہیں۔ میڈیا رپورٹس کے مطابق بونیر کے بعد صوابی میں بھی کلاؤڈ برسٹ، لینڈ سلائیڈنگ اور سیلابی ریلوں میں بہہ کر 15 افراد جاں بحق ہوگئے، دالوڑی گاؤں گدون میں سیلابی ریلوں کے باعث 12 گھر ڈوب گئے، پہاڑی علاقہ ہونے کی وجہ سے مختلف مقامات پر لینڈ سلائیڈنگ بھی ہوئی، ضلع صوابی میں رات سے جاری بارش کے باعث ندی نالوں میں طغیانی آنے سے نشیبی علاقے زیرآب آگئے۔

ڈپٹی کمشنر صوابی نصراللہ خان نے تصدیق کی ہے کہ کلاؤڈ برسٹ سے کئی گھر ڈوب چکے ہیں، انتظامیہ، ریسکیو اور دیگر امدادی ٹیمیں جائے وقوعہ کی جانب روانہ ہو چکی ہیں، ہری پور اور مردان سے بھی ریسکیو ٹیموں کو طلب کرلیا گیا ہے، اپیل ہے کہ رضاکارانہ طور پر لوگ متاثرہ افراد کی مدد کیلئے نکلیں، وزیراعلیٰ خیبر پختونخواہ اور چیف سیکرٹری صورتحال مانیٹر کر رہے ہیں۔

(جاری ہے)

دوسری طرف موسلا دھار بارش کے باعث پشاور کا صدر بازار، کوہاٹی بازار، موچی بازار و دیگر علاقے پانی میں ڈوب گئے، وزیراعلیٰ خیبرپختونخواہ علی امین گنڈاپور کی ہدایت پر بارشوں کے بعد پشاور میں فوری آپریشن شروع کردیا گیا، واٹر اینڈ سینیٹیشن سروسز پشاور اور ریسکیو 1122 کی ٹیمیں مکمل طور پر فعال نظر آئیں، نالوں کی صفائی اور نکاسی آب کو بروقت یقینی بناتے ہوئے سڑکوں کی کلیئرنس اور شہریوں کو ریلیف فراہم کرنے کا عمل جاری رہا، پشاور شاہین مسلم ٹاؤن کلئیر کرتے ہوئے سڑک سے پانی ختم کردیا گیا، اس دوران نالیوں سے کمبل نکل آئے، اس کے علاوہ شہر بھر میں آپریشن کلین اپ جاری ہے، جس کے تحت تمام سڑکوں کو کلئیر کیا جارہا ہے۔

بتایا گیا ہے کہ موسلادھار بارشوں کے پیش نظر ریسکیو 1122 پشاور کی ٹیمیں نشتر آباد، گلبہار، کوہاٹ روڈ، یونیورسٹی روڈ، پریس کلب روڈ اور حیات آباد سمیت شہر کے مختلف علاقوں میں تعینات کی گئی تاکہ عوام کو بروقت امداد فراہم کی جا سکے، اس وقت 70 سے زائد اہلکار امدادی سرگرمیوں میں مصروف ہیں، جن کے ہمراہ 8 ایمبولینسز، 2 ڈیزاسٹر ریسپانس گاڑیاں اور 6 ڈی واٹرنگ پمپس موجود ہیں۔

ریسکیو حکام نے بتایا کہ ڈیزاسٹر ٹیمیں بھی شہر بھر میں مسلسل پٹرولنگ کر رہی ہیں تاکہ سڑکوں پر جمع پانی کو نکالنے اور پانی میں پھنسے شہریوں اور گاڑیوں کو محفوظ مقامات تک پہنچانے کا عمل جاری رکھا جا سکے، فی الحال کئی مقامات پر ڈی واٹرنگ کا عمل جاری ہے جب کہ ریسکیو 1122 کی ٹیمیں کسی بھی ہنگامی صورتحال سے نمٹنے کے لیے مکمل طور پر تیار ہیں۔