لاہور ڈویلپمنٹ پروگرام عوام کو بنیادی سہولتیں فراہم کرنے کا سب سے بڑا منصوبہ ہے، فیصل ایوب کھوکھر

لاہور (اُردو پوائنٹ اخبارتازہ ترین - اے پی پی۔ 18 اگست2025ء) صوبائی وزیر کھیل و لیبر ملک فیصل ایوب کھوکھر اور ایم این اے و صدر مسلم لیگ (ن) لاہور ملک سیف الملوک کھوکھر نے پی پی 168، یو سی 111 ہنجروال، آمنہ پارک ٹینکی والی گلی میں لاہور ڈویلپمنٹ پروگرام کے تحت ترقیاتی منصوبوں کے آغاز کے سلسلے میں منعقدہ ایک بڑے جلسہ عام میں شرکت کی۔جلسہ عام سے قبل مین ملتان روڈ پر استقبالیہ کیمپ کا انعقاد کیا گیا، جہاں دونوں رہنماؤں کا شاندار استقبال کیا گیا۔

جلسہ عام سے خطاب کرتے ہوئے صوبائی وزیر ملک فیصل ایوب کھوکھر نے کہا کہ وزیراعلیٰ پنجاب مریم نواز کے وژن کے تحت لاہور سمیت پنجاب بھر میں حقیقی معنوں میں عوامی خدمت کے منصوبے شروع کئے جا رہے ہیں۔لاہور ڈویلپمنٹ پروگرام عوام کو بنیادی سہولتیں فراہم کرنے کا سب سے بڑا منصوبہ ہے، جو غریب اور متوسط طبقے کی زندگی میں آسانیاں پیدا کرے گا۔

(جاری ہے)

یہ منصوبے سیاست نہیں بلکہ خدمت خلق کی بہترین مثال ہیں۔ انہوں نے یو سی111 میں متعدد نئی ترقیاتی اسکیموں کا اعلان کرتے ہوئے کہا کہ 122 کروڑ روپے کی لاگت سے06 بڑے منصوبے شروع ہوں گے،جن میں نئی سیوریج لائنز،سڑکوں کی تعمیر و مرمت اور بنیادی انفرااسٹرکچر کی بہتری کو ترجیح دی گئی ہے۔ ملک سیف الملوک کھوکھر نے اپنے خطاب میں کہا کہ مسلم لیگ (ن) کا منشور ہمیشہ عوامی خدمت اور ترقی رہا ہے۔

آج جس طرح اربوں روپے کے ترقیاتی منصوبے عوام کی دہلیز پر پہنچائے جا رہے ہیں، یہ مسلم لیگ (ن) کی کارکردگی اور خدمت کے جذبے کا عملی ثبوت ہے۔ہم اپنے قائدین میاں محمد نواز شریف،وزیر اعظم محمد شہباز شریف اور وزیراعلیٰ مریم نواز کی قیادت میں عوامی خوشحالی اور ترقی کے سفر کو جاری رکھیں گے۔انہوں نے مزید کہا کہ مسلم لیگ (ن) نے ہمیشہ عوامی اعتماد کو خدمت کے ذریعے سراہا ہے اور آنے والا وقت ثابت کرے گا کہ عوام کی ترقی اور خوشحالی صرف ن لیگ کی حکومت ہی یقینی بنا سکتی ہے۔

جلسہ عام میں ہزاروں افراد،مختلف سیاسی و سماجی رہنما اور ممبران لوکل باڈی نے بھرپور شرکت کی اور ترقیاتی اسکیموں پر اطمینان کا اظہار کیا جبکہ شرکا نے اس عزم کا اظہار کیا کہ وہ مسلم لیگ (ن) کے ترقیاتی وژن اور عوامی خدمت کے مشن میں بھرپور تعاون جاری رکھیں گے۔