خیبرپختونخوا کے سیلاب متاثرہ علاقوں میں وبائی امراض کی نگرانی کا عمل شروع،تمام اضلاع میں الرٹ جاری، 289 میڈیکل کیمپس قائم

پیر 18 اگست 2025 20:55

پشاور (اُردو پوائنٹ اخبارتازہ ترین - این این آئی۔ 18 اگست2025ء)خیبرپختونخوا کے سیلاب متاثرہ علاقوں میں وبائی امراض کی نگرانی کا عمل شروع کردیا گیا۔ مشیر صحت احتشام علی کی ہدایت پر تمام اضلاع میں الرٹ جاری کیا گیا ہے۔ محکمہ صحت کے مطابق متاثرہ اضلاع میں 289 میڈیکل کیمپس قائم کیے گئے ہیں جہاں اب تک 5627 مریضوں کا معائنہ کیا گیا۔ ان کیمپس میں متعدی امراض کے 380 کیسز رپورٹ ہوئے ہیں جن میں سب سے زیادہ کیسز سوات سے سامنے آئے۔

رپورٹ کے مطابق سانس کی بیماریوں اور اسہال کے کیسز میں اضافہ ہوا ہے۔

(جاری ہے)

سوات میں 62 بچے اور 43 بچیاں اے آر آئی (ARI) میں مبتلا ہیں جبکہ اسہال اور خون آلود دست کے 140 سے زائد کیسز رپورٹ ہوئے ہیں۔ اس کے علاوہ خارش (Scabies) کے کئی کیسز بھی سامنے آئے ہیں جبکہ ایبٹ آباد میں ملیریا کے 2 مریض رپورٹ ہوئے ہیں۔خوش آئند بات یہ ہے کہ تاحال متعدی امراض سے کسی موت کی اطلاع نہیں ملی۔ محکمہ صحت کے مطابق متاثرہ علاقوں میں 21 ہیلتھ فیسلٹیز جزوی جبکہ ایک مکمل طور پر متاثر ہوئی ہے۔ مشیر صحت احتشام علی کے مطابق عوام کو اکیلا نہیں چھوڑا جائے گا، سیلاب متاثرین کو بروقت علاج اور ادویات فراہم کی جارہی ہیں۔