سینٹرل کانٹریکٹ کا اعلان: اے کیٹیگری ختم، بابر اور رضوان کی بھی تنزلی

سینٹرل کانٹریکٹس یکم جولائی 2025ء سے 30 جون 2026ء تک لاگو ہوںگے، گزشتہ سال 27 کھلاڑیوں کو کانٹریکٹ دیے گئے تھے

ذیشان مہتاب منگل 19 اگست 2025 11:20

سینٹرل کانٹریکٹ کا اعلان: اے کیٹیگری ختم، بابر اور رضوان کی بھی تنزلی

لاہور (اردو پوائنٹ تازہ ترین اخبار ۔ 19 اگست 2025ء ) سال 2025-26ء کے لیے قومی کرکٹرز کے سینٹرل کانٹریکٹ کا اعلان کردیا گیا۔

پاکستان کرکٹ بورڈ نے 30 کھلاڑیوں کو کانٹریکٹس دے دیے، پرفارمنس کی بنیاد پر کیٹیگری بی، سی اور ڈی میں 10،10 کھلاڑی رکھے گئے ہیں۔ کانٹریکٹس یکم جولائی 2025ء سے 30 جون 2026ء تک لاگو ہوں گے، گزشتہ سال 27 کھلاڑیوں کو کانٹریکٹ دیے گئے تھے۔

جب کہ اس سال تعداد بڑھ کر 30 ہوگئی ہے، رواں برس 12 نئے کھلاڑیوں کو شامل کیا گیا ہے۔

نئے کھلاڑیوں میں احمد دانیال، فہیم اشرف، حسن علی، حسن نواز، حسین طلعت، خوشدل شاہ، محمد عباس، محمد حارث، محمد نواز، صاحبزادہ فرحان، سلمان مرزا اور صوفیان مقیم کو نئے کھلاڑیوں میں شامل کیا گیا ہے۔

9 کھلاڑی اپنی سابقہ کیٹیگری برقرار رکھنے میں کامیاب ہوئے ہیں جب کہ 8 کھلاڑی کانٹریکٹ حاصل کرنے میں ناکام رہے۔

(جاری ہے)

اے کیٹگری ختم:

رواں برس اے کیٹیگری میں کسی کھلاڑی کو شامل نہیں کیا گیا اسی لیے یہ کیٹیگری فی الحال ختم کردی گئی، گزشتہ برس اے کیٹیگری میں بابر اعظم اور محمد رضوان کو شامل کیا گیا تھا۔ اس سال نسیم شاہ بی سے سی کیٹیگری میں آگئے، بی کیٹیگری میں شامل ٹیسٹ کپتان شان مسعود بی سے ڈی کیٹیگری میں آگئے۔ اس کے علاوہ اوپنر فخر زمان کی بی کیٹیگری میں واپسی ہوئی ہے۔

بی کیٹگری:

بابر اعظم، محمد رضوان، شاہین شاہ، فخر زمان، شاداب خان، ابرار احمد، حارث رؤف، حسن علی، صائم ایوب، سلمان علی آغا کو بی کیٹیگری میں شامل کیا گیا ہے۔

سی کیٹگری:

عبداللہ شفیق، نسیم شاہ، سعود شکیل، فہیم اشرف، ساجد خان، محمد نواز، محمد حارث، صاحبزادہ فرحان، حسن نواز، نعمان علی کے حصے میں سی کیٹیگری آئی۔

ڈی کیٹگری:

شان مسعود، حسین طلعت، محمد عباس، محمد وسیم جونیئر، محمد عباس آفریدی، خوشدل شاہ، احمد دانیال، سلمان مرزا، خرم شہزاد، صفیان مقیم ڈی کیٹیگری میں شامل ہیں۔