وزیرریلوے محمد حنیف عباسی کی زیر صدارت اجلاس، ریلوے آپریشن کو مزید موثر اور فعال بنانے کیلئے اہم فیصلے

منگل 19 اگست 2025 18:49

لاہور (اُردو پوائنٹ اخبارتازہ ترین - اے پی پی۔ 19 اگست2025ء) وفاقی وزیر ریلوے محمد حنیف عباسی کی زیر صدارت منگل کو ریلوے ہیڈکوارٹرز لاہور میں ایک اہم اجلاس منعقد ہوا،جس میں مکینیکل ڈیپارٹمنٹ کو جامع اہداف سونپے گئے اور ریلوے آپریشن کو مزید موثر اور فعال بنانے کیلئے متعدد فیصلے کئے گئے۔وفاقی وزیر ریلوے نے ایڈیشنل جنرل مینیجر مکینیکل کو جنرل اسٹور کی مکمل انسپکشن کرنے اور اس سلسلے میں تھرڈ پارٹی تجزیہ رپورٹ دس روز میں وزارت کو بھیجنے کی ہدایت دی۔

اجلاس میں فیصلہ کیا گیا کہ سیفٹی سے متعلقہ آئٹمز کی فوری فراہمی کیلئے ایک ہفتے میں پلان تیار کیا جائے۔وزیر ریلوے نے واضح کیا کہ60 دن کے اندر ریل کاروں کی ریفریشمنٹ مکمل کر کے مسافروں کو بہتر سہولیات فراہم کی جائیں۔

(جاری ہے)

اسی طرح کوئلہ لے جانے والی600 ویگنوں کی موجودہ ان فٹ حالت پر تشویش کا اظہار کرتے ہوئے ہدایت کی گئی کہ انہیں دو ماہ کے اندر مکمل طور پر فٹ کر کے فریٹ سسٹم میں شامل کیا جائے،تاکہ کراچی سے ریونیو میں خاطر خواہ اضافہ ہو سکے۔

اجلاس میں نارووال سیکشن کی اپ گریڈیشن کا فیصلہ کیا گیا،جس کے بعد اس سیکشن پر چلنے والی گاڑیوں میں سہولیات میں بہتری لائی جائے گی۔مزید برآں وزیر ریلوے نے چینی کوچز میں نئے ایئر کنڈیشننگ یونٹس مقررہ مدت سے پہلے نصب کرنے اور اسلام آباد کیرج فیکٹری کی پروڈکشن اسپیڈ بڑھانے کی ہدایت دی تاکہ جلد از جلد نئی کوچز سسٹم میں شامل کی جا سکیں۔

وزیر ریلوے حنیف عباسی نے پاور پلانٹس کی آوٹ سورسنگ کے امکانات پر ورکنگ کرنے کی بھی ہدایت کی جبکہ حادثات کا شکار انجنوں کی مرمت کیلئے روڈ میپ پیش کرنے کا حکم دیا۔اس حوالے سے چیف ایگزیکٹو آفیسر ریلوے کی نگرانی میں اے جی ایم مکینیکل ان تمام ہدایات پر عملدرآمد کرائیں گے۔مزید برآں وزیر ریلوے نے شعبہ ٹریفک اینڈ کمرشل کے افسران سے ون آن ون ملاقاتیں بھی کیں اور واضح کیا کہ ریلوے میں"رائٹ مین فار دی رائٹ جاب" کے اصول پر عمل ہوگا۔محمد حنیف عباسی نے کہا کہ صرف وہی افسر اہم پوسٹنگ اور ترقی کا حقدار ہوگا جو کارکردگی دکھائے گا۔ کارکردگی نہ دکھانے والے افسران اپنے نتائج کے خود ذمہ دار ہوں گے۔