ماضی میں جعلی ڈگری سے متعلق الزام تراشی سے پی آئی اے کو نقصان، ملک کی ساکھ متاثر ہوئی، طارق فضل چوہدری

منگل 19 اگست 2025 17:11

اسلام آبا د(اُردو پوائنٹ اخبارتازہ ترین - این این آئی۔ 19 اگست2025ء)وزیر پارلیمانی امور ڈاکٹر طارق فضل چوہدری نے کہا ہے کہ پی آئی اے کی پروازیں یورپی ممالک کے لئے بحال ہو چکی ہیں ، ماضی میں پائلٹوں کی جعلی ڈگریز سے متعلق الزام تراشی سے نہ صرف پی آئی اے کو نقصان پہنچا بلکہ ملک کی ساکھ متاثر ہوئی۔

(جاری ہے)

منگل کو ایوان بالا کے اجلاس میں وقفہ سوالات کے دوران سینیٹرز کامران مرتضیٰ اور دنیش کمار کے سوالات کا جواب دیتے ہوئے ڈاکٹر طارق فضل چوہدری نے کہا کہ ماضی میں 10 روٹس پر پی آئی اے کی سروس مختلف مدت کیلئے بند رہی ہے، اس کی بڑی وجہ یورپی یونین آف ایوی ایشن سیفٹی ایجنسی کی جانب سے یورپی ممالک کیلئے پی آئی اے کی پروازوں پر پابندی تھی، گزشتہ دور حکومت میں سابق وزیر ہوا بازی کے پائلٹوں کے جعلی ڈگریوں سے متعلق بیان سے نہ صرف پی آئی اے کو بہت زیادہ نقصان ہوا بلکہ عالمی سطح پر ملک کی ساکھ بھی مجروح ہوئی،200 پائلٹوں کی جعلی ڈگری کا الزام لگایا گیا تھا لیکن صرف 7 یا 8 پائلٹوں کی ڈگریز جعلی نکلیں، اب یہ پابندیاں ختم ہو چکی ہیں ، یورپی ممالک کے لئے پروازیں شروع ہوچکی ہیں۔