فیس بک پر محبت، پھر شادی، گھر پہنچنے پر دولہا کا دلہن کو پہچاننے سے انکار

جمعرات 21 اگست 2025 16:27

نئی دہلی (اُردو پوائنٹ اخبارتازہ ترین - این این آئی۔ 21 اگست2025ء)اتر پردیش کے ایک نوجوان اور جھارکھنڈ کی ایک لڑکی کے درمیان فیس بک پر ہونے والی دوستی شادی تک تو جا پہنچی، لیکن بعد میں لڑکے نے اسے پہچاننے سے ہی انکار کر دیا۔بھارتی میڈیا کے مطابق اتر پردیش کے ایک نوجوان اور جھارکھنڈ کی ایک لڑکی کے درمیان فیس بک پر شروع ہونے والی دوستی جلد ہی ایک ایسے ڈرامائی تنازع میں بدل گئی جس میں پولیس کو مداخلت کرنا پڑی۔

لڑکی نے سون بھدر کے رہنے والے اس نوجوان کی فرینڈ ریکویسٹ قبول کی تھی، جو ایک بڑے ادارے میں کام کرتا ہے، ان کی آن لائن چیٹس اور ویڈیو کالز جلد ہی ایک رشتے میں بدل گئیں، آمنے سامنے ملاقات کے بعد دونوں نے شادی کا فیصلہ کیا اور ایک مقامی مندر میں انہوں نے ایک دوسرے کو قبول کیا اور روایتی سات پھیروں کی رسم ادا کی۔

(جاری ہے)

لڑکی کا دعوی ہے کہ اس نے لڑکے کے ساتھ نئی زندگی شروع کرنے کے لیے اپنا خاندان چھوڑ دیا لیکن کہانی میں ایک چونکا دینے والا موڑ اس وقت آیا جب وہ اپنے شوہر کے گھر گئی جہاں اس کا استقبال کرنے کے بجائے، نوجوان نے مبینہ طور پر شادی کو تسلیم کرنے سے ہی انکار کر دیا، اس نے مبینہ طور پر لڑکی سے کہا کہ معاف کرنا تم کون ہو میں تمہیں نہیں جانتا۔

اس کے انکار پر دلہن ہکا بکا رہ گئی اور پھوٹ پھوٹ کر رونے لگی اور پھر اس نے دھوکا دہی کا الزام لگاتے ہوئے گھر کے باہر دھرنا دے دیا، جس کے بعد جلد لوگ جمع ہوگئے اور معاملہ اتنا بڑھا کہ پولیس کو مداخلت کرنا پڑی۔بعد میں لڑکی نے تھانے میں تحریری شکایت درج کرائی جس میں کہا گیا کہ اس شخص نے مجھے فیس بک کے ذریعے رشتے کا جھانسہ دیا، مجھ سے شادی کی اور اب مجھے اپنی بیوی کے طور پر قبول کرنے سے انکار کر رہا ہے، مجھے انصاف اور حقوق کا تحفظ دیا جائے۔پولیس حکام نے تصدیق کی ہے کہ وہ اس کیس کی تحقیقات کر رہے ہیں، شادی کے قانونی پہلووں اور لڑکی کی جانب سے لگائے گئے الزامات کا جائزہ لیا جائے گا، اگر دعوے درست پائے گئے تو ضروری کارروائی کی جائے گی۔