بٹن دبا کر سارا پانی نہیں نکال سکتے، کراچی میں سیلابی صورتحال پر وزیراعلیٰ سندھ کا مؤقف

کراچی میں 200 ملی میٹر بارش سے اربن فلڈنگ ہوئی جس پر معذرت خواہ ہیں، یہ نہیں ہونا چاہیے تھا، ہم نے عوام سے کہا بارش میں جہاں ہیں وہیں بیٹھے رہیں مگر لوگ سڑکوں پر نکل آئے؛ مراد علی شاہ کی گفتگو

ساجد علی جمعرات 21 اگست 2025 14:47

بٹن دبا کر سارا پانی نہیں نکال سکتے، کراچی میں سیلابی صورتحال پر وزیراعلیٰ ..

کراچی ( اُردو پوائنٹ اخبارتازہ ترین۔ 21 اگست 2025ء ) وزیراعلیٰ سندھ سید مراد علی شاہ کا کہنا ہے کہ کراچی میں 200 ملی میٹر بارش سے اربن فلڈنگ ہوئی جس پر معذرت خواہ ہیں، یہ نہیں ہونا چاہیے تھا مگر بٹن دبا کر سارا پانی نہیں نکال سکتے۔ تفصیلات کے مطابق جیو نیوز سے گفتگو کرتے ہوئے انہوں نے کہا کہ صوبہ سندھ کے دارالحکومت کراچی میں بارش سے اربن فلڈنگ کی صورتحال نہیں ہونی چاہیے تھی اس کے لیے معذرت خواہ ہیں لیکن لوگوں سے بھی التجا ہے کہ حکومت کی بات سنا کریں، ہم نے عوام سے کہا کہ بارش میں جہاں ہیں وہیں بیٹھے رہیں مگر لوگ سڑکوں پر نکل آئے، ساری شاہراہ فیصل جام تھی، ہمیں روڈ بند کرکے لوگوں کو روکنا چاہیئے تھا جو نہیں کیا یہ بات مانتے ہیں۔

مراد علی شاہ کہتے ہیں کہ منگل کو بارش شروع ہوئی تو وہ میئر کراچی، چیف سیکریٹری، ایم ڈی واٹر کارپوریشن سمیت دیگر حکام کے ساتھ اجلاس میں مصروف تھے تاہم اس وقت طوفانی بارش کے حوالے سے کوئی پیشگی اطلاع نہیں دی گئی تھی، ہم پر تنقید کی گئی کہ نالے چوک ہیں، اگر نالے چوک تھے تو5 سے 6 گھنٹے میں سارا پانی کیسے نکل گیا، برساتی صورتحال کی خود مانیٹرنگ مانیٹرنگ کر رہا ہوں، شہریوں کو ہر ممکن سہولت فراہم کرنا ہماری ترجیح ہے، تمام ادارے عوامی ریلیف کے لیے ہم آہنگی کے ساتھ کام کریں۔

(جاری ہے)

بتایا جارہا ہے کہ وزیراعلیٰ سندھ سید مراد علی شاہ کو شہر کراچی کی برساتی صورتحال پر کمشنر کراچی کی جانب سے بریفنگ دی گئی، ترجمان وزیراعلیٰ سندھ کا کہنا ہے کہ کمشنر کراچی حسن نقوی نے بریفنگ میں بتایا کہ شہر کی بیشتر مارکیٹوں سے برساتی پانی نکالا جا چکا ہے، مارکیٹوں میں کاروباری سرگرمیاں بحال ہیں، شہر بھر میں تمام انتظامی اور بلدیاتی ادارے مل کر کام کر رہے ہیں۔