صحافی خاور حسین کی موت گولی لگنے سے ہوئی: ابتدائی پوسٹ مارٹم رپورٹ

دوبارہ پوسٹ مارٹم کی حتمی رپورٹ لیبارٹری کے نتائج موصول ہونے کے بعد جاری کی جائے گی

جمعرات 21 اگست 2025 21:16

صحافی خاور حسین کی موت گولی لگنے سے ہوئی: ابتدائی پوسٹ مارٹم رپورٹ

کراچی (اُردو پوائنٹ اخبارتازہ ترین - این این آئی۔ 21 اگست2025ء)صحافی خاور حسین کی دوبارہ کی گئی پوسٹ مارٹم رپورٹ میں انکشاف ہوا ہے کہ ان کی موت سر میں لگنے والی گولی سے ہوئی۔ابتدائی رپورٹ کے مطابق گولی کانٹیکٹ شاٹ تھی جو دائیں جانب سے داخل ہو کر بائیں جانب سے نکلی۔ رپورٹ میں کہا گیا ہے کہ گولی لگنے سے دماغ مکمل طور پر متاثر ہوا جس کے نتیجے میں موت واقع ہوئی۔

(جاری ہے)

میڈیکل بورڈ میں بتایا گیا ہے کہ دوبارہ پوسٹ مارٹم اور موت کے درمیان کا وقت 36 گھنٹے سے زائد تھا جبکہ صحافی کے جسمانی اعضا نارمل اور صحت مند پائے گئے۔میڈیکل بورڈ کے مطابق دوبارہ پوسٹ مارٹم کی حتمی رپورٹ لیبارٹری کے نتائج موصول ہونے کے بعد جاری کی جائے گی۔واضح رہے کہ 16 اگست کو صحافی خاور حسین کی لاش سانگھڑ کے ایک ریسٹورنٹ کے باہر سے ملی تھی، جس کے بعد ان کی موت کے حوالے سے مختلف سوالات اٹھائے جا رہے ہیں۔