کمشنر اوورسیز پاکستانیز کمیشن پنجاب ثمن رائے کی ایم ڈی اوورسیز پاکستانیز فاونڈیشن افضال بھٹی سے ملاقات

اوورسیز پاکستانیوں کی فلاح و بہبود کیلئے اداروں کے مابین ہم آہنگی بڑھانے پر اتفاق

جمعرات 21 اگست 2025 19:30

لاہور (اُردو پوائنٹ اخبارتازہ ترین - این این آئی۔ 21 اگست2025ء) کمشنر اوورسیز پاکستانیز کمیشن پنجاب ثمن رائے اور ڈی جی او پی ایف پنجاب احمر نائیک نے اوورسیز پاکستانی فاؤنڈیشن کے ایم ڈی افضال بھٹی، بیورو آف امیگریشن و اوورسیز ایمپلائمنٹ کے ڈی جی طیب اور او پی ایف کے ڈائریکٹر ویلفیئر سے اہم ملاقات کی۔اس ملاقات میں اوورسیز پاکستانیوں سے متعلق فلاح و بہبود، شکایات کے ازالے، اور باہمی تعاون پر تفصیلی گفتگو کی گئی۔

(جاری ہے)

بیورو آف امیگریشن و اوورسیز ایمپلائمنٹ کے ڈی جی جناب طیب نے بیرون ملک کام کرنے والے پاکستانیوں کے اعداد و شمار اور ڈیٹا کی فراہمی پر آمادگی کا اظہار کیا، جو مستقبل میں پالیسی سازی اور فلاحی اقدامات کے لیے نہایت مفید ثابت ہوگا۔اس موقع پر او پی ایف کے ایم ڈی افضال بھٹی بھی موجود تھے، جنہوں نے او پی ایف کے جاری منصوبوں اور خدمات پر روشنی ڈالی۔ انہوں نے کہا کہ اوورسیز پاکستانی فاؤنڈیشن بیرونِ ملک مقیم پاکستانیوں کی فلاح و بہبود، ان کی شکایات کے ازالے اور قانونی معاونت کے لیے مؤثر کردار ادا کر رہی ہے۔شرکاء نے اس امر پر اتفاق کیا کہ اوورسیز پاکستانیوں کے مسائل کے حل اور ان کی فلاح کیلئے بین الادارہ جاتی تعاون کو مزید مؤثر اور مربوط بنایا جائے گا۔