ٹرانسپورٹ اتھارٹی پنجاب کی صوبہ کے تمام اضلاع کی کارکردگی رپورٹ جاری

جمعہ 22 اگست 2025 17:58

سرگودھا (اُردو پوائنٹ اخبارتازہ ترین - اے پی پی۔ 22 اگست2025ء) ٹرانسپورٹ اتھارٹی پنجاب نے صوبہ کے تمام اضلاع کی کارکردگی کا تفصیلی جائزہ لیتے ہوئے جامع رپورٹ جاری کر دی ہے۔ رپورٹ میں ایکسل لوڈ کنٹرول، ایل پی جی سلنڈر کریک ڈاؤن اور اوورچارجنگ کے خلاف کارروائیوں کی بنیاد پر اضلاع کی درجہ بند ی کے مطابق ڈپٹی کمشنر کیپٹن ریٹائرڈ محمد وسیم کی قیادت میں ضلع سرگودہا نے شاندار کارکردگی کا مظاہرہ کرتے ہوئے پنجاب بھر میں پہلا نمبر حاصل کیا ہے۔

(جاری ہے)

سرگودہا نے مئی، جون اور جولائی میں ایکسل لوڈ کے موثر کنٹرول، جولائی میں ایل پی جی سلنڈر کے خلاف کریک ڈاؤن اور جولائی و اگست میں اوورچارجنگ کے خلاف نمایاں کارروائیوں کے باعث یہ اعزاز اپنے نام کیا ہے۔رپورٹ کے مطابق کارکردگی کی بنیاد پر ملتان دوسرے، فیصل آباد تیسرے اور ساہیوال چوتھے نمبر پر رہے۔ ان چاروں اضلاع کے ڈپٹی کمشنرزکو شاندار کارکردگی کے اعتراف میں حسن کارکردگی کے سرٹیفکیٹ دیے جائیں گے۔ صوبائی ٹرانسپورٹ اتھارٹی کے مطابق ناقص کارکردگی کا مظاہرہ کرنے والے اضلاع کے خلاف سخت اقدامات کیے جائیں گے تاکہ تمام اضلاع آئندہ بہتر نتائج دے سکیں۔