پاکستان شاہینز ٹاپ اینڈ ٹی ٹوئنٹی سیریز کے سیمی فائنل میں پہنچ گئی، نیپال کو دلچسپ مقابلے میں ایک رن سے ہرادیا

جمعہ 22 اگست 2025 23:04

ڈارون(اُردو پوائنٹ اخبارتازہ ترین - این این آئی۔ 22 اگست2025ء)پاکستان شاہینز نے ٹاپ اینڈ ٹی ٹوئنٹی سیریز کے چھٹے میچ میں نیپال کو سنسنی خیز مقابلے کے بعد ایک رن سے شکست دیدی۔ یہ اس سیریز میں پاکستان شاہینز کی چھ میچوں میں چوتھی کامیابی ہے۔اس طرح اس نے سیمی فائنل میں جگہ بنالی ہے۔جمعہ کے روز کھیلے گئے میچ میں پاکستان شاہینز نے ٹاس جیت کر پہلے بیٹنگ کرتے ہوئے 20 اوورز میں9 وکٹوں کے نقصان پر144 رنز بنائے۔

جواب میں نیپال کی ٹیم 20 اوورز میں 7 وکٹوں پر 143 رنز بنانے میں کامیاب ہوسکی۔پاکستان شاہینز کی اننگز میں کپتان محمد عرفان خان 3 چوکوں اور ایک چھکے کی مدد سے 42 رنز بناکر ناٹ آؤٹ رہے۔ عبدالصمد ایک چوکے اور ایک چھکے کی مدد سے 26 اور محمد وسیم جونیئر ایک چھکے اور دو چوکوں کی مدد سے 23 رنز بناکر آؤٹ ہوئے۔

(جاری ہے)

نیپال کی طرف سے سومپال کامی نے 30 رنز دے کر تین وکٹیں حاصل کیں۔

نندن یادو اور دیپندرا سنگھ نے دو دو کھلاڑیوں کو آؤٹ کیا۔نیپال کی اننگز میں کپتان روہیت کمار نے عمدہ بیٹنگ کرتے ہوئے ایک چھکے اور چھ چوکوں کی مدد سے 52 رنز بنائے۔ آصف شیخ نے 27 رنز سکور کیے۔ان دونوں نے دوسری وکٹ کی شراکت میں 55 رنز کا اضافہ کیا۔نیپال کو آخری اوور میں جیت کے لیے 8 رنز درکار تھے جبکہ آخری گیند پر اسے 3 رنز درکار تھے۔اس اوور کی پہلی گیند پر فیصل اکرم نے کوشال ملا کو 2 رنز پر غازی غوری کے ہاتھوں سٹمپڈ کرادیا اور پھر آخری گیند پر دیپندرا سنگھ 41 رنز کی عمدہ اننگز کھیل کر رن آؤٹ ہوگئے۔پاکستان شاہینز کی طرف سے وسیم جونیئر اور فیصل اکرم نے دو دو وکٹیں حاصل کیں۔ وکٹ کیپر غازی غوری نے دو اسٹمپڈ کیے اور دو رن آؤٹ میں بھی وہ شریک تھے۔