ڈپٹی کمشنرلاہورکی زیر صدارت عید میلاد النبی کے انتظامی و سکیورٹی انتظامات کو حتمی شکل دینے کیلئے اجلاس

ہفتہ 23 اگست 2025 22:57

لاہور (اُردو پوائنٹ اخبارتازہ ترین - اے پی پی۔ 23 اگست2025ء) ضلعی انتظامیہ لاہور نے ڈپٹی کمشنر سید موسی رضا کی قیادت میں عید میلاد النبی کے انتظامی اور سکیورٹی انتظامات کو حتمی شکل دینے کے لیے اجلاس منعقد ہوا جس کی مشترکہ صدارت ڈپٹی کمشنر اور ڈی آئی جی آپریشنز فیصل کامران نے کی ۔ اجلاس میں تمام متعلقہ محکموں کے سربراہان اور مرکزی جلوسوں کے منتظمین شریک ہوئے۔

ترجمان کے مطابق اجلاس میں مرکزی جلوسوں اور محافل میلاد کے سکیورٹی اور دیگر انتظامات کا تفصیلی جائزہ لیا گیا۔ ڈپٹی کمشنر نے ہدایت دی کہ جلوسوں کے روٹس پر صفائی، سڑکوں کی مرمت واسٹریٹ لائٹس کی بحالی فوری مکمل اور تمام تجاوزات کا خاتمہ یقینی بنایا جائے۔ ڈی آئی جی آپریشنز نے فول پروف سکیورٹی کے عزم کا اعادہ کیا جبکہ ڈپٹی کمشنر نے تمام محکموں کو بہترین کوآرڈینیشن کے ساتھ ذمہ داریاں نبھانے کی ہدایت دی۔

(جاری ہے)

پولیس کو جلوسوں کی سکیورٹی اور ٹریفک روانی کے لیے جامع پلان تیار کرنے، محکمہ صحت کو روٹس پر فرسٹ ایڈ کیمپس اور ایمبولینسز کی موجودگی یقینی بنانے کا حکم دیا گیا۔اسی طرح واسا اور ایم سی ایل کو مین ہولز کو فوری کور کرنے کی ہدایت کی گئی۔ ڈپٹی کمشنر نے واضح کیا کہ عید میلاد النبی ۖ کے روز بجلی اور گیس کی لوڈشیڈنگ نہیں ہوگی، لاہور کا مرکزی جلوس ریلوے اسٹیشن سے شروع ہو کر داتا دربار پر اختتام پذیر ہوگا۔ ڈی سی سید موسی رضا نے کہا کہ عقیدت مندوں کو ہر ممکن سہولت فراہم کرنا انتظامیہ کی ذمہ داری ہے۔