اسرائیل نے غزہ سٹی کے جنوبی زیتون علاقے کی تمام عمارتیں مسمار کر دیں

اسرائیلی فوج نے تعمیراتی مشینری کے ساتھ ساتھ بم سے لیس روبوٹس کا استعمال کیا،سول ڈیفنس غزہ

جمعرات 28 اگست 2025 14:41

غزہ(اُردو پوائنٹ اخبارتازہ ترین - این این آئی۔ 28 اگست2025ء)غزہ کی سول ڈیفنس کے مطابق، اسرائیلی زمینی کارروائی کے دوران غزہ سٹی کے زیتون محلے کے جنوبی حصے میں ایک بھی عمارت سلامت نہیں بچی۔عرب ٹی وی کے مطابق غزہ کی سول ڈیفنس کا کہنا تھا کہ اسرائیل نے رواں ماہ کے آغاز میں غزہ سٹی پر قبضے کے لیے زمینی کارروائی شروع کی تھی، جس کے بعد زیتون کے علاقے میں 1,500 سے زیادہ مکانات تباہ کیے گئے۔

(جاری ہے)

ریسکیو سروس کے ترجمان، محمود بصل نے انادولو نیوز ایجنسی کو بتایا کہ محلے کے جنوبی حصے میں اب کوئی عمارت باقی نہیں بچی، ان ہتھیاروں نے علاقے میں تباہی کی شدت کو بڑھا دیا ہے۔انہوں نے بتایا کہ اسرائیلی فوج نے تعمیراتی مشینری کے ساتھ ساتھ بم سے لیس روبوٹس کا استعمال کیا، جو روزانہ سات مقامات پر دھماکے کرتے ہیں، جبکہ ڈرونز کے ذریعے گھروں کی چھتوں پر دھماکہ خیز مواد پھینکا جاتا ہے۔انہوں نے مزید کہا کہ اس منظم تباہی کی وجہ سے زیتون کے 80 فیصد رہائشیوں کو اپنا علاقہ چھوڑ کر مغربی یا شمالی غزہ سٹی کی طرف ہجرت کرنا پڑی ہے۔