Live Updates

ملک کے آبی ذخائر میں پانی کی صورت حال تسلی بخش، دریاوں میں پانی کی آمد جاری

جمعرات 28 اگست 2025 22:41

اسلام آباد (اُردو پوائنٹ اخبارتازہ ترین - آن لائن۔ 28 اگست2025ء) واپڈا کے ترجمان کے مطابق، ملک کے اہم دریاو ں اور آبی ذخائر میں پانی کی موجودہ صورت حال تسلی بخش ہے، جبکہ دریاو ں میں پانی کی آمد میں مسلسل اضافہ دیکھنے میں آ رہا ہے۔ تربیلا، منگلا اور چشمہ ریزوائرز میں پانی کے مجموعی ذخیرے کی مقدار ایک کروڑ 17 لاکھ 22 ہزار ایکڑ فٹ تک پہنچ چکی ہے۔

ترجمان کے مطابق تربیلا کے مقام پر دریائے سندھ میں پانی کی آمد ایک لاکھ 86 ہزار 100 کیوسک ریکارڈ کی گئی ہے، جبکہ تربیلا ریزوائر میں پانی کا ذخیرہ 57 لاکھ 28 ہزار ایکڑ فٹ ہے۔دوسری جانب منگلا کے مقام پر دریائے جہلم میں پانی کی آمد 43 ہزار 300 کیوسک ہے، اور منگلا ریزوائر میں آج پانی کا ذخیرہ 57 لاکھ 82 ہزار ایکڑ فٹ ریکارڈ کیا گیا۔

(جاری ہے)

چشمہ بیراج میں پانی کی آمد 2 لاکھ 52 ہزار 200 کیوسک تک پہنچ گئی ہے، جبکہ چشمہ ریزوائر کا موجودہ ذخیرہ 2 لاکھ 12 ہزار ایکڑ فٹ ہے۔

اسی طرح ہیڈ مرالہ پر دریائے چناب میں پانی کی آمد ایک لاکھ 91 ہزار 900 کیوسک اور نوشہرہ کے مقام پر دریائے کابل میں پانی کی آمد 33 ہزار 400 کیوسک ریکارڈ کی گئی ہے۔ماہرین کے مطابق، مون سون کے جاری سلسلے اور پہاڑی علاقوں سے بہاؤ کے باعث پانی کی یہ سطح زراعت اور آبی ضروریات کے لیے اطمینان بخش سمجھی جا رہی ہے۔ تاہم، نچلے درجے کے علاقوں میں پانی کے بہاؤ پر مسلسل نگرانی جاری ہے تاکہ کسی ممکنہ سیلابی خطرے سے بروقت نمٹا جا سکے۔