Live Updates

جولائی میں مہنگائی کی شرح 11.1 فیصد سے کم ہوکر 4.1 فیصد پر آگئی ہے، وزارت خزا نہ

جمعرات 28 اگست 2025 21:45

اسلام آباد (اُردو پوائنٹ اخبارتازہ ترین - آن لائن۔ 28 اگست2025ء) وزارت خزانہ نے رواں مالی سال کے پہلے ماہ جولائی 2025 کا ماہانہ معاشی آؤٹ لک جاری کر دیا ہے، جس میں ملک کی معاشی صورتحال کے کئی مثبت اشاریے سامنے آئے ہیں۔ رپورٹ کے مطابق ترسیلات زر، برآمدات، درآمدات اور ایف بی آر کے محصولات میں نمایاں اضافہ ریکارڈ کیا گیا ہے، جبکہ مہنگائی کی شرح میں نمایاں کمی دیکھنے میں آئی ہے۔

رپورٹ کے مطابق جولائی میں ترسیلات زر میں 7.4 فیصد اضافہ ہوا، برآمدات میں 16.2 فیصد اور درآمدات میں 11.8 فیصد اضافہ ریکارڈ کیا گیا۔ ایف بی آر کے محصولات میں بھی 14.8 فیصد اضافہ ہوا، جو ملکی معیشت کے لیے خوش آئند پیش رفت ہے۔مرکزی بینک کے ذخائر 9.3 ارب ڈالر سے بڑھ کر 14.3 ارب ڈالر ہو گئے ہیں۔

(جاری ہے)

براہ راست غیر ملکی سرمایہ کاری (FDI) میں بھی 6.9 فیصد کا اضافہ دیکھنے میں آیا، اگرچہ مجموعی بیرونی سرمایہ کاری میں 55 فیصد کمی ریکارڈ کی گئی ہے۔

رپورٹ کے مطابق جولائی میں مہنگائی کی شرح 11.1 فیصد سے کم ہوکر 4.1 فیصد پر آگئی ہے، جو عوام کے لیے کسی قدر ریلیف کا باعث بن سکتی ہے۔ تاہم کرنٹ اکاؤنٹ خسارہ 25 کروڑ ڈالر سے زائد رہا، اور روپے کی قدر میں کمی بھی رپورٹ کا حصہ ہے۔27 اگست 2024 کو ڈالر کا ریٹ 278 روپے 30 پیسے تھا، جو رواں مالی سال 27 اگست 2025 کو بڑھ کر 281 روپے 80 پیسے ریکارڈ کیا گیا۔ماہرین کے مطابق رپورٹ میں مثبت اشاریوں کے ساتھ ساتھ کچھ چیلنجز بھی موجود ہیں جن پر حکومت کو پالیسی سطح پر توجہ دینا ہوگی، تاکہ معاشی استحکام کا یہ سفر جاری رکھا جا سکے۔