Live Updates

مذاکرات کا حامی، مگر اسکول اور مساجد پر حملے کرنے والوں کیساتھ کیسے بات کی جائے، خواجہ سعد رفیق

ماضی میں صوبائی اور مرکزی حکومت کے درمیان ملکر کام کرنے کی کمی رہی، دونوں حکومتوں کو دہشتگردی کیخلاف ایک ساتھ کام کرنا ہوگا، سابق وزیر

جمعہ 29 اگست 2025 16:55

باجوڑ (اُردو پوائنٹ اخبارتازہ ترین - این این آئی۔ 29 اگست2025ء)سابق وزیر خواجہ سعد رفیق نے کہا ہے کہ مذاکرات کا حامی ہوں، مگر اسکولوں اور مساجد پر حملے کرنے والوں کے ساتھ کیسے مذاکرات کیے جائیں۔سابق صوبائی وزیر و رہنما مسلم لیگ (ن ) خواجہ سعد رفیق نے سیلاب سے متاثرہ باجوڑ کے مختلف علاقوں کا دورہ کیا، بعد ازاں میڈیا سے گفتگو کرتے ہوئے انہوں نے کہا کہ جن لوگوں نے اسلام کے نام پر اسلحہ اٹھایا، ان کا اسلام سے کوئی تعلق نہیں ہے۔

انہوں نے کہا کہ خیبرپختونخواہ میں پہلے بھی آپریشن ہو چکا ہے، ہونا تو یہ چاہیے تھا کہ اس آپریشن کی نوبت ہی نہ آتی، ماضی میں صوبائی اور مرکزی حکومت کے درمیان مل کر کام کرنے کی کمی رہی، دونوں حکومتوں کو دہشت گردی کیخلاف ایک ساتھ کام کرنا ہوگا۔

(جاری ہے)

خواجہ سعد رفیق نے کہا دہشتگردی کیخلاف قبائلی مشران کو بھی ایک ہوناچاہیے، ریاست نے مشران کو موقع فراہم کیا اورانہوں نے دہشتگردوں سے بات بھی کی۔

سابق صوبائی وزیر نے کہا میں سیاست سے پیچھے نہیں ہٹا بلکہ انتخابی سیاست سے اپنے آپ کو دور کر دیا ہے۔دورہِ باجوڑ کے حوالے سے انہوں نے کہا کہ میں یہاں ذاتی حیثیت میں آیاہوں، باجوڑ میں لوگ دہشت گردوں کیخلاف آپریشن کی وجہ سیگھروں سے نقل مکانی کر چکے ہیں، آپریشن کے بعد یہاں سیلاب کی آفت آگئی ،یہ دوہری آفت ہے۔سابق وزیر نے کہا کہ خواجہ فاونڈیشن کے ذریعے آپریشن اور سیلاب سے متاثرہ افراد کی مدد کرناچاہتے ہیں، دونوں حکومتوں نے متاثرین کے لیے جس پیکج کا اعلان کیا ہے اس پر عملدرآمد بھی ہونا چاہیے، یہاں اس لیے آیا ہوں تاکہ متاثرین یہ محسوس نہ کریں کہ وہ تنہا ہیں۔

خواجہ سعد رفیق نے کہا کہ سول انتظامیہ کولوگوں کے مسائل کا پتہ ہوتاہے لہذا سول انتظامیہ کو مظبوط کیا جانا چاہیے۔