Live Updates

رین ایمرجنسی کے تحت عملے کی چھٹیاں منسوخ کر دی گئی ہیں،صوبائی وزیر زراعت

جمعہ 29 اگست 2025 20:16

کراچی (اُردو پوائنٹ اخبارتازہ ترین - اے پی پی۔ 29 اگست2025ء) صوبائی وزیر زراعت سردار محمد بخش مہر کی ہدایت پر محکمہ زراعت کے تمام افسران اور عملے کی چھٹیاں منسوخ کر دی گئی ہیں ۔ حیدرآباد میں ڈی جی زراعت کے دفتر میں رین ایمرجنسی سیل قائم کر دیا گیا ہے تاکہ ہنگامی حالات میں کسانوں کی مدد حاصل کر سکیں۔جمعہ کو ترجمان محکمہ زراعت کے مطابق صوبے کے تمام اضلاع اور تپہ سطح تک ایمرجنسی مراکز قائم کیے گئے ہیں، 30اضلاع میں ڈائریکٹرز اور ڈپٹی ڈائریکٹرز کو فوکل پرسن مقرر کر دیا گیا ہے تاکہ سیلابی صورتحال میں فوری اقدامات کیے جا سکیں۔

مزید برآں، زراعت ایکسٹینشن ونگ حیدرآباد میں 24/7 رین ایمرجنسی کنٹرول روم بھی فعال کر دیا گیا ہے، جس کی نگرانی ڈائریکٹر جنرل ایگریکلچر ایکسٹینشن سندھ کریں گے۔

(جاری ہے)

وزیر زراعت نے متعلقہ افسران کو ہدایت دی ہے کہ اپنے اضلاع میں الرٹ رہیں، کسانوں سے براہ راست رابطے میں رہیں اور روزانہ کی بنیاد پر سیکریٹری زراعت محمد زمان ناریجو کو رپورٹ پیش کریں۔

انہوں نے کہا کہ ممکنہ سیلاب سے متاثرہ کسانوں کو بیج، کھاد اور زرعی آلات کی فوری فراہمی یقینی بنائی جائے گی۔انہوں نے انجینئرنگ ونگ کو بھی مشینری اور بلڈوزر ہمہ وقت تیار رکھنے کے احکامات جاری کردیئے ہیں تاکہ ضلعی انتظامیہ کو ضرورت پڑنے پر فوری معاونت فراہم کی جا سکے۔ افسران کو ہدایت کی گئی ہے کہ وہ پی ڈی ایم اے اور دیگر اداروں کے ساتھ مسلسل رابطے میں رہیں، کسانوں کی سہولت کے لیے ایک ہیلپ لائن نمبر 0311-1164611 بھی جاری کر دیا گیا ہے۔

صوبائی وزیر زراعت کے مطابق وزیراعلی سندھ نے وزرا ء کو دریائے سندھ کے لیفٹ اور رائٹ بینک پر ڈیوٹیاں تفویض کر دی ہیں تاکہ کسی بھی ہنگامی صورتحال سے فوری طور پر نمٹا جا سکے۔صوبائی وزیر زراعت نے کہا کہ موسمیاتی تبدیلیوں کے باعث ملک میں سیلابی صورتحال مزید سنگین ہو رہی ہے، جس سے زرعی شعبے سمیت دیگر شعبے بھی متاثر ہو رہے ہیں۔