Live Updates

وفاقی وزیر قانون و انصاف اعظم نذیر تارڑ کا وزیرِ اعظم کی خصوصی ہدایت پر حافظ آباد کےسیلاب سے متاثرہ علاقوں کا دورہ

جمعہ 29 اگست 2025 21:40

اسلام آباد (اُردو پوائنٹ اخبارتازہ ترین - اے پی پی۔ 29 اگست2025ء) وفاقی وزیر قانون و انصاف اعظم نذیر تارڑ نے وزیرِ اعظم کی خصوصی ہدایت پر حافظ آباد کے سیلاب سے متاثرہ علاقوں کا دورہ کیا۔ترجمان کے مطابق وزیر قانون وانصاف نے اس موقع پر کہا کہ وزیر اعظم شہباز شریف اور وزیرِ اعلیٰ مریم نواز اس مشکل گھڑی میں عوام کے ساتھ کھڑے ہیں، متاثرین کی بحالی کے حوالے سے وفاقی اور صوبائی حکومت کی جانب سے مکمل نگرانی کی جا رہی ہے اور حکومت اپنا پورا کردار ادا کرے گی۔

وفاقی وزیر قانون اعظم نذیر تارڑ کے حافظ آباد میں سیلاب سے متاثرہ علاقوں کے دورے کے موقع پر صوبائی وزیر ٹرانسپورٹ بلال اکبر اور ایم این اے سائرہ افضل بھی ہمراہ تھیں۔وزیرِ قانون کو ضلعی انتظامیہ نے متاثرہ علاقوں میں ریسکیو آپریشنز اور سیلابی صورتحال پر تفصیلی بریفنگ دی۔

(جاری ہے)

وزیرِ قانون نے اپنے حلقے کا دورہ کرتے ہوئے متاثرہ دیہاتوں میں لوگوں سے ملاقات کی اور کہا کہ اس وقت سب سے بڑا چیلنج متاثرہ افراد کی بحالی کے حوالے سے ہے ۔

انہوں نے ریلیف آپریشنز مزید تیز کرنے اور فوری امدادی سہولیات فراہم کرنے کی ہدایت بھی کی ۔انہوں نے کہا کہ سیلاب متاثرین کی ہر ممکن امداد کی جائے گی، حکومت متاثرہ عوام کے شانہ بشانہ ہے۔وزیر قانون نے سیلاب متاثرین کی بحالی کے لئے تمام وسائل بروئے کار لانے کا اعلان کیا۔