لاہور میں مکانات کی چھتیں گرنے سے چار افراد جاں بحق، چار زخمی

بیدیاں روڈ پر چھت گرنے سے تین افراد جاں بحق ،چار زخمی ہوئے، اولڈ انارکلی میں چھت گرنے سے ایک شخص جاں بحق ہوا

ہفتہ 30 اگست 2025 18:05

لاہور (اُردو پوائنٹ اخبارتازہ ترین - این این آئی۔ 30 اگست2025ء) بیدیاں روڈ پر مکان کی چھت گرنے سے تین افراد جاں بحق اور چار زخمی ہوگئے، اولڈ انارکلی میں چھت گرنے سے ایک شخص جاں بحق ہوگیا۔بتایا گیا ہے کہ مانا والا بیدیاں روڈ اسماعیل پورہ میں ایک گھر کی چھت گرگئی جس میں متعدد افراد ملبے میں دب گئے۔اطلاع ملتے ہی امدادی ٹیمیں موقع پر پہنچ گئیں، اربن سرچ اینڈ ریسکیو ٹیم نے ملبے میں سے چار افراد کو زندہ نکال لیا جب کہ تین لاشیں برآمد ہوئیں۔

(جاری ہے)

ریسکیو 1122کے مطابق حادثے میں 60سالہ رمضان ولد صوفی، 18سالہ دعا فاطمہ اور سات سالہ کرن جاں بحق ہوگئے، 25سالہ مافیہا زوجہ زبیر، 15سالہ سلمان ولد اختر، 20سالہ نازیہ ولد اقبال، 25سالہ اکرام ولد اختر کو زخمی حالت میں لاہور جنرل ہسپتال منتقل کردیا گیا۔ایس پی کینٹ کیپٹن ریٹائرڈ قاضی علی رضا کے مطابق لاشیں تحویل میں لے کر پوسٹ مارٹم کے لیے ڈیڈ ہائوس منتقل کردی گئیں، تمام پہلوئوں کو مد نظر رکھتے ہوئے تحقیقات کی جا رہی ہے۔دریں اثنا لاہور کے علاقے اولڈ نارکلی میں واقع گھر کی چھت گرنے سے ایک شخص جاں بحق ہوگیا۔